Pamilyang Ruba i-secure

Hatagan sa igong seguridad sa Cebu City Police Office ang mga kabanay sa namatay’ng Nursing student nga si Ruby Jade Ruba, kini kun mahibalik na unya dinhi sa dakbayan sa Sugbu.

Kini maoy gitataw ni CCPO Chief Sr. Supt. Patrocinio Comendador human usab ang maguwang sa biktima nga si Richie Rubie mipadayag sa iyang kabalaka sa ilang seguridad sa pagbalik dinhi sa Sugbu   tungod kay ang lugar nga ilang gi-istahan diha sa B. Rodriguez gikatahong dili layo sa mga estambayanan sa mga sakop sa gang nga mipatay ug mitulis sa iyang igsuon sa miaging semana.

Matud pa ni Comendador nga ila gyud nga lihukon ang paghatag sa igong seguridad sa mga kabanay sa  ingon maprotihean gayud kini.

Hinuon gipadayag niini nga dili na kaayo ingon kadako ang hulga nga gikabalak-an sa mga kaliwat sa namatay  tungod kay normal  sa mga kriminal nga kun gipangita sila sa kapolisan molaylo kini ug mobalhin sa laing lugar.

Nasayran nga si Ruba ilubong na karong Sabado sa ala una sa hapon  sa public cemetery sa lungsod sa Macrohon, Southern  Leyte, human gipusil  patay sa mga tulisan nga sakop sa Crips Gang nga  gidudahang sila si Ivan Marabat, Mark Anthony Gabriel Labitad ug Carl Marx Carticiano.

Subay niini, isip kabahin sa iyang programa nga mabungkag ang mga street gang karong tuiga, mosentro sila sa pagpangayo og abag sa mga  barangay nga maila ang mga lider niini.