P1.5 milyon gipagawas sa Talisay

Kagamhanan sa dakbayan sa Talisay ang motunol og hinabang nga pinansiyal ngadto sa mga nasunogan niadtong  milabay’ng semana matud ni Felipa Solana hepe sa social welfare sa dakbayan.

Si Solana sa pakighinabi niini sa Banat News mibutyag nga ang kagamhanan sa siyudad migahin og P1.5 milyones diin ang maong salapi naggikan sa calamity fund sa dakbayan.

Ang mga tag-iya gyud sa mga balay diin naugdaw ang makadawat og P5 mil matag usa, P2,500 sa partially damage ug P1,500 ang mga nag-abang lang.

Gibutyag ni Solana nga ang Provincial Social Welfare ang mohatag usab og counterpart diin mga housing materials ang gikatakda nilang ihatag.

Apan matud niini nga ubos pa sa negosasyon ang lote nga dunay gilapdon nga 6,000 metro kwadrado nga kanhi gitukoran sa mga balay sa mga biktima.

Kadaghanan sa mga nasunogan ang naa pa karon sa sports complex sa Tabunok apan uban kanila ang nagbutang og tent diha sa lugar nga nasunogan sa kanhi nila pwesto.

Gitataw ni Cabriana nga ang ubang mga biktima ang nagtukod og barong-barong sa kanhi nila pwesto nga nasunog.

Base sa ulahing natala sa social welfare sa dakbayan adunay 129 ka pamilya ang naapektohan sa barangay Tabunok ug 611 ka tawo samtang sa San Isidro 39 ka pamilya ang apektado ug 166 ka tawo.

Sa Barangay Tabunok mikabat sa 113 ka bata ang naapektohan kinsa ang maong mga bata nagpanuigon sa 1-5 anyos samtang sa Barangay San Isidro 18 ka bata usab ang naapektohan sa sama usab nga edad.