Daghang balaodnon mo-usab sa ‘libel’

Ubay-ubay na ang mga balaodnon nga nag-ung-ong sa kongreso labot sa pag-usab sa Article 354 ug 361 sa Revised Penal Code sa nasud.

Kini may kalabutan sa kasong libel nga nakapaukay usab sa Sugbu sa miaging mga adlaw, human mabilanggo ang usa ka magsisibya subay usab sa kalangay niini sa pagpyansa.

Labing awahi nga balaodnon nga gipalabang sa Senado mao ang proposal ni Senador Richard Gordon nga maglahi sa political ug private libel.

Sa nahisgutang balaodnon sa Senador, lisud na unya ang pagkiha og political libel, apan magpabilin hinuon ang classification sa libel batok sa pribadong tawo.

Ang nakalahi sa kasong political libel,  ang kihante giingong mao na ang  mopamatuod nga dunay malisya ang gisulti sa gireklamo.

Apan alang kang  Konsehal Hilario Davide III, ang labing maayo sa nahisgutang mga balaodnon mao ang mag-decriminalize niini.

Ang konsehal nga usa usab ka abogado mihulagway sa libel nga usa lang ka ordinaryong kaso ug wala na kinahanglana nga masilotan pa ang makonbikto.

“Alang nako, maayo tingali nga i-decriminalize na lang na and then himuon na lang na nga murag civil action ba for damages,” sumala ni Davide.

Midugang ang konsehal nga labihang daghana na ang kaso nga nagtipun-og sa korte ug kini giingong makuha-kuhaan kun i-decriminalize na ang kasong libel.

Duna na hinuoy mga senador nga wala makauyon sa pag-decriminalize sa libel, tungod kay ang civil suit alang sa damages giingong makapordoy sa media organization.

Partikular sa mga magbabalaod nga dili pabor pag-decriminalize sa kasong libel mao sila si Senador Juan Ponce Enrile ug Senador Joker Arroyo.

Nasayran nga labing minos lima na ka balaodnon ang nag-ung-ong sa kongreso, nga mag-decriminalize, mag-abolish, o magwagtang sa silot sa nahisgutang kaso.

Kagahapon, ang mga sakop sa Cebu Citizen Press Council nagtigum sa Marriott Hotel ug gituki ang nagkadaiyang bersiyon sa mga balaodnon nga gitumong pag-usab sa balaod sa libel.

Karong Marso 24, ipresentar sa CCPC atol sa regular nga tigum niini ang mga importanteng probisyon sa mga balaodnon aron maoy basehan sa ipagawas unya nga position paper.