Patay na nga napalgan ang usa ka car electrician sa usa ka kasagbutan human kini tulisa didto sa Barangay Tabok dakbayan sa Danao sa milabay’ng adlaw.
Ang biktima mao si Erwin Gonzales, 21, lumad sa Bicol ug temporaryong nagpuyo sa Guinsay dakbayan sa Danao kini human giila sa iyang ka-live-in nga si Inocenta Lumayan mga alas 7:00 na sa milabay’ng gabii human kini mapalging patay sa buntag sa susamang adlaw.
Base sa pasiunang imbestigasyon ni SPO1 Allan Muñoz sa kapolisan sa Danao posibleng gitulis si Gonzales sa wala pa kini patya gumikan kay nawagtang na ang cell phone niini ug pitaka nga base sa pamahayag ni Lumayan daghan og kuwarta ang biktima sa dihang milakaw kini sa ilang gipuy-an.
Nakita ni SPO1 Muñoz nga adunay mga samad sa liog ug nawong si Gonzales ug posibleng gipusposan hinungdan sa kamatayon niini.
Sa dugang imbestigasyon nasuta nga sa wala pa kini mapalging patay gikan kini nag-inom uban sa iyang mga higala sulod sa usa ka videokehan.
Nagduda si Muñoz nga gidala sa hilit nga dapit si Gonzales, gitulis ug gipatay sa maong dapit.