Patrolya sa dakbayan pahingusgan

Nunot sa nakat-unang leksyon sa nahitabong pagtulis-patay sa tinun-an sa nursing niadtong milabay’ng semana ug sa pagkasikop sa mga gidudahang suspek pahugtan pa og maayo sa kapolisan ang ilang pagpatrolya sa kadalanan.

Kagahapon gipatawag ni Sr. Supt. Patrocinio Comendador ang tanang police station chief sa dakbayan aron hisgutan ang pag-usab ug paghingusog sa kampanya kontra krimen sa ilang mga hurisdiksyon.

Lakip sa gihisgutan mao ang papel sa mga police stations ug sa mga special units kontra kriminalidad.

Si Supt. Pablo Labra, deputy chief sa Cebu City Police Office mitug-an sa Banat News nga gimando ni Comendador ang mas daghang night watch patrols sa kadalanan matag gabii.

Matud pang Labra ang tanang police sa kada police station mo-duty gyud makausa sa usa ka buwan sa night watch patrol, ang dakbayan dunay kapin 1,000 ka mga police.

Sumala pang Labra lakip sa gihisgutan mao ang pagbutang na unya og patrolya sa mga secondary routes susama sa gihitaboan sa Gov. Roa Street sa barangay Capitol Site diin gitulis ug gipatay si Ruby Jade Ruba nga tinun-an ug graduating sa kursong nursing.

Mga miyembro sa Crips gang nga sila si Ivan “Epeng” Marabat ug Mark Anthony Gabriel Labitad ug Carl Marx Carticiano ang gidakop nga maoy gitumbok sa mga testigos nga responsable sa krimen, samtang giapil og kiha sa mga polis si Maria Baswa tungod sa pagpalit niini sa cellphone nga gikawat sa tulo gikang Ruba.

Kabahin sa kampanya kontra krimen, duna na koordinasyon ang CCPO ngadto sa Association of Barangay Council aron awhagon pagpahingusog sa ilang patrolya sa matag barangay.

Samtang si Comendador nagkanayon nga gitahasan na ang Mobile Patrol Group sa paglista sa mga dapit nga ngitngit ug kulang ang sugang dagitabnon aron ipahibalo sa city street lighting.

Mamahimo sad nga mas agresibo ang kapolisan sa pagsitar sa mga magsuroy-suroy sa kadalanan ilabi na niadtong managtapok-tapok.

Sa laing bahin, wala pa masuta kung si kinsa ang mahatagan sa ganti nga giandam sa city hall alang sa pagkasikop sa mga nitulis ni Ruba apan sumala pang Sr. Insp. George Ylanan, task force commander sa TF Ruby Jade Ruba nga dunay impormante kining maoy nitutok sa grupo sa mga tulisan hangtud nga sila nangadakpan.