Usa ang patay samtang nalandig sa tambalan ang iyang asawa ug upat ka mga anak ingon man pito ka silingan human sila mangahilo sa “tikong” nga usa ka matang sa butete kun ‘puffer fish’ nga ilang gikaon kagahapon sa udto diha sa sitio Romblon barangay Malbago, Madridejos.
Nakabsan sa iyang kinabuhi si Jose Abner Batbatan, 34, samtang naangol iyang asawang si Jocelyn Batbatan ug mga anak nga sila si – Gaudioso, Glen, Gerald ug Mary Jane.
Nangahilo usab ang ilang silingang sila si Junnifer ug Sanita Nipangke; Cecilio Mancio, Jojen Consas, Guillermo Payakpak, ug magsuong sila si Merlinda ug Myrna Rojas tungod sa pagpanakit sa ilang mga tiyan, pagsuka ug pagkalipong.
Ang mga biktima gidala sa Bantayan Island District Hospital sumala pang Madridejos municipal councilor Emelita Gabito, sa pakighinabi sa Banat News kagabii.
Si Gabito kinsa mao ang tsirman on committee on health mitug-an nga 12 sa mga biktima ang pabiling naa sa tambalanan tungod kay daghan sila og nakaong butete.
Nasuta nga si Junnifer mipalit og walo ka kilong “tikong” gikan sa usa ka mananagat sa barangay Tarong ug gipaluto kini sa magsuong Rojas.
Human niini ila kining gipangkaon apan namatikdan nila dayon ang pagpanakit sa ilang tiyan, ulo ug nagsugod sila og suka.
“Sige mana sila og kaon og butete kay suhito mana sila anang isdaa. Pero naay nagsulti nga mora’g lahi gyud daw to nga klase sa butete ang nakaon,”sumala pang Gabito.
Ang butete usa ka isdang makahilo apan alang sa nakasuhito paglimpyo niini mahimo kining kan-on, sa nasud sa Japan ang puffer fish usa ka delicacy apan kinahanglang kahibawo gyud ang kusinerong moluto niini.
Sa samang barangay niadtong milabay'ng tuig dunay upat nga nakabsan og kinabuhi samtang lima ang naangol lakip na niini ang otso anyos nga batang lalaki.
Si Gabito mitug-an nga mipagawas na og hinabang ang ilang mayor alang sa mga biktima ug motabang usab og pagpalubong sa namatay.