2 ka crips 'mipatay' sa nursing

Arestado ang duha ka sakop sa Crips ug laing kauban nga maoy gitumbok nga mitulis-patay sa tinun-an sa nursing niadtong Huwebes sa kaadlawon.

Ang mga tulisan gipresentar kagahapon ni Sr. Supt. Patrocinio Comendador human madakpi sa hingpit ang gunman kagahapon sa kaadlawon diha sa usa ka bilyaran sa dalan B.Rodriguez nga estambayanan sa ilang grupo.

Ang nangadakpan giilang sila si Mark Anthony Gabriel Labitad, 18, taga Ponce compound sitio Oprra barangay Capitol Site ug Ivan “Epeng” Marabat, 20, nga taga Unit 4, barangay Kalunasan, pulos nangangkong mga “OG” sa Crips gang kun “original gangsta.”

Samtang ang niboluntaryo pagtahan sa iyang kaugalingon ang ikatulong suspek nga giingong maoy drayber sa motorsiklo nga si Carl Marx Carteciano, 21, dili miyembro sa maong gang.

Ang tulo maoy gitumbok nga mitulis ug mipatay kang Ruby Jade Ruba, 20, lumad nga taga Macrohon, Southern Leyte kinsa gikatakdang mogradwar sa kursong nursing karong Marso 30.

Si Ruba gitulis niadtong Marso 6 diha sa Gov. Roa St. sa barangay Capitol Site samtang nanghuwam og adaptor sa laptop nga ilang gamiton sa ilang project, gikuha sa tulisan ang cellphone niini ug dihang midagan gipusil kini sa tulisan.

Miangkon si Marabat nga siya maoy nipusil sa biktima tungod kay midagan kini ug misinggit ug tungod usab sa awhag ni Labitad nga kini pusilon kay banha.

Si Labitad sa iyang bahin miangkon nga dihang nangikyas na sila iyang gitabunan ang plate number sa kolor blue nga motor nga ilang gisakyan (dili kolor pula sa unang report).

Matud pa sa duha nga gikan pa sila nanginom diha sa bilyaran sa B. Rodriguez ug padulong na unta niadtong tungura mamauli dihang ilang naagian si Ruba ug higala niini nga nag-text diha sa Gov. Roa.

Gikatahong si Carticiano mismo maoy mipahunong sa motor ug mimando kanila nga “daugon ta na” sanglit kay hubog ug may dala silang armas kursunada ang duha nga mitulis kang Ruba apan nidagan kini ug nisinggit hinungdan nga gipusil kini ni Marabat sa likod.

Positibong gitudlo sa tulo ka batan-ong lalaking testigos nga gusto untang motabang niadtong tungura ang mga suspek nga mao gyuy nitulis ug nipusil kang Ruba.

Samtang gipaabot pa sa kapolisan nga mopakita ang higala ni Ruba aron mapatan-aw usab ang tulo kung mao ba gyud kini ang mga tulisan.

Samtang pareho nilang gitumbok si Carticiano nga maoy drayber sa motor, nasuta nga ang maong motor iya sa maguwang niini apan gipanghimakak tanan niini nga kauban sila sa duha niadtong gabhiuna.

Si Carticiano gipahibalo kabahin sa pasangil sa laing miyembro sa Crips Gang nga 17 anyos maoy nakadungog sa balita kagahapon sa DySS nga kini maoy gitumbok nga ikatulong suspek.

Gikuyogan si Carticiano sa iyang maguwang ug ang miyembro sa Crips nipahibalo kaniya sa Cebu City Police Office aron “i-clear” ang iyang pangalan sa hitabo.

Apan si Task Force Ruby Jade Ruba commander, Sr. Insp. George Ylanan nitug-an sa Banat News nga positibong gitumbok si Carticiano nila ni Labitad ug Marabat nga maoy ilang kauban niadtong tungura ug mao usab ang naghipos sa ilang armas nga kalibre .38 snubnose.

Matud pang Marabat ang maong armas maoy “service firearm” sa Crips nga gamiton sa ilang mga miyembro kung gikinahanglan. Nakuha usab sa kapolisan ang motorsiklong gigamit sa maong hitabo.

Si Comendador nitug-an bisan dako og impact ang nahitabo wala niya kini makita dihang iyang gisuroy ang dakbayan atol sa kagabhion tungod kay daghan gihapong mga tawo nga nanuroy, naglingaw-lingaw.