Nagtaptap namusil og ex-con

Bag-uhay pang nakagawas nga inmate gikan sa Cebu City Jail ang gipusil patay sa duha ka nagmotorsiklo nga mamumuno mga alas 10:45 niadtong Sabado sa gabii diha sa Dr. Reyes St., Purok 3 Upper,  barangay Camputhaw ning dakbayan.

Ang biktima giila sa Homicide Section nga si Charles Siegberto Bacatan alyas “Berto,” 32, nga residente sa nahisgutang lugar, nga bag-uhay lang nakagawas sa Cebu City Jail niadtong Febrero 1, sa milabay'ng bulan gumikan sa kasong may kalambigitan sa illegal drugs.

Samtang ang mga gikatahong mamumuno ni Bacatan, gikatahong duha ka wala mailhing lalaki nga nagsakay sa usa ka motorsiklo nga XRM nga kolor blue.

Gikataho nga ang maong mamumuno nakasul-ob kinig itom nga jacket naka-eye glasses ug crash helmet nga  nagtaptap og panapton ang nawong niini.

Sa imbestigasyon ni SPO4 Jay Yballe sa Cebu City Homicide Section ug mga kaubanan ang asawa sa biktima nga si Tonette Bacatan nitug-an nga mga alas 10:45  gabii  niadtong Sabado sa gabii ang iyang bana naglingkod   sa usa ka bangko daplin sa dalan nga nag text niadtong higayuna.

Ang mga  mamumuno  kalit lang nibutho  niagi sa tungod ug kalit mi-u turn ug ang angkas nanaog  ug niduol sa biktima dayon pusil niini.

Maayong pagkaigo sa tuong bahin sa mata  dapit sa may kilay apan gitiwasan pa gayud   pinaagi sa pagpauwan og bala   makadaghang higayon   sa lawas ni  Bacatan hinungdan nga nalup-og kini daplin sa dalan.

Human sa maong panghitabo ang suspetsado daling nisakay sa motorsiklo nga nagpaturatoy sa pagdagan ngadto na sa main road sa nahisgutang dapit.

Ang   Scene of the Crime Operatives (SOCO) naka-recover  og upat  ka mga kabhang sa .40  kaliber og  usa ka deformed nga slug usa ka gamay'ng pitaka didto sa lawas sa biktima nga adunay sulod nga lima ka gagmay'ng pakete nga gituuhang shabu.