Cebu Zoo ipadumala og pribadong tawo

Nagplano karon si Mayor Tomas Osmeña pagtugyan sa Cebu City Zoo ngadto sa usa ka pribadong tawo nga giingong nag-atiman usab og daghang matang sa hayop.

Matud ni Osmeña nga usa ka Robert Yopangco didto sa kauluhan ang gusto nga mopanindot sa  zoo ug muatiman sa mga hayop niini.

Nagkanayon ang mayor nga gihan-ay na ni Yopangco ang iyang proposal alang sa hingpit nang pagdumala niini sa Cebu City Zoo.

“He might not only use or improve our existing Zoo, he will take care of the animals, it’s not just maintaining per se, actually developing the Zoo.”sumala ni Osmeña.

Nakumbinser ang mayor sa pagdumala ni Yopangco og mga hayop sa dihang iyang giduaw ang  zoo niini sa Subic ug ang botanical garden sa lungsod sa Mendez duol sa siyudad sa Tagaytay.

Tumong ni Osmeña pagtugyan sa Cebu City Zoo ngadto kang Yopangco, nga maatiman kini ug dili na usab unya magproblema ang dakbayan sa pagmintinar niini.

“So that we will have a real zoo that other people can visit and we don’t have to worry the maintenance and other sources of animals,” miingon ang mayor.

Nasayran hinuon sa Banat News nga si Yopangco nagtukod na kaniadto ug  zoo dinhi sa Sugbu, apan sa wala matino nga hinungdan, wala usab kini magdugay.

Apan gitataw ni mayor Osmeña nga daghan karon og mga binuhing hayop si Yopangco atol sa iyang pagduaw sa zoo ug sa botanical garden niini.

Kun mahingpit na ang pagtugyan sa siyudad sa Cebu City Zoo ngadto kang Yopangco, plano usab sa mayor nga butangan ug botanical garden ang South Road Properties (SRP).