Asset “Suspek” Sa Rob-Slay

Usa ka police asset nga gipasanginlang nangilkil diha sa dakbayan sa Mandaue nga nadakpan kagahapon sa kaadlawon ang gisusi usab karon kung may kalambigitan sa pagtulis ug pagpatay sa graduating nga tinun-an sa nursing.

Ang gidakop ug giimbestigar karon mao si Reynaldo Bayabado, 41, lumad nga taga barangay Poblacion- Pardo.

Si Bayabado gidakop sa kapolisan sa Subangdaku police station pinanguluhan ni Insp. George Aniñon human ireklamo kining nangilkil sa usa ka Rodulfo Bohol, residente sa sitio Mahusay sa barangay Subangdaku sa nahisgutang dakbayan.

Sayo pa nianang gabhiuna, gikatahong nag-inom si Bayabado ug si Bohol duol balay sa naulahi ug giingong mibungat ang suspek nga dunay tawong nisugo kaniya nga siya ipapatay ug nag-down na og P30 mil.

Apan gumikan kay managhigala silang duha dili niya kini ihinayon basta mobayad lang kini og P50mil, tungod niini gikatahong nipasalig ang biktima nga mangita og kwarta ug iya lang kini tawgan basta makakita na sa maong kantidad.

Nianang mibiya na ang suspek nagkara-kara si Bohol ug iyang asawa sa pagsumbong ngadto sa Subangdaku police station diin giandam dayon ang budol money ug gitawgan si Bayabado.

Si Bayabado gikatahong miabot diha sa ilang dapit aron kuhaon ang kwarta apan giingong nakabantay kining dihay mga polis ug daling misutoy og ikyas hangtud nga nahitabo ang ginukdanay kutob sa ihawan sa dakbayan sa Sugbu diin kini gibabagan sa mga mangingihaw ug naabtan sa mga polis.

Nakuha sa posesyon niini ang duha ka Nokia 1100 nga cellphone, usa ka Nokia 7360 cellphone nga kolor itom, usa ka paltik nga kalibre 38 rebolber ug mga buhing bala ingon man ang iyang motorsiklong Rusi nga may plakang OX-1822 nga walay rehistro.

Tungod sa maong mga cellphone ilabi na sa Nokia 7360 nga mas mahal kumparar sa laing duha ka cellphone nakuha kaniya nitumaw ang pagduda sa mga polis nga posibleng mao kini ang cellphone sa gitulis ug gipatay nga si Ruby Jade Ruba diha sa dalan Gov. Roa sa barangay Capitol Site.

Si Bayabado daling gidala sa Cebu City Police Office ug gipailawom sa paraffin test ingon man sa ballistics test ang armas nga nakuha kaniya. Gipanghimakak hinuon ni Bayabado nga iya ang maong armas.

Si Bayabado dihang gihinabi sa mga tigbalita kagahapon mihimakak nga siya nangilkil ug may kalambigitan sa pagtulis-patay kang Ruba, si Ruba gitulis sa duha ka mga lalaking nagmotorsiklo ug gikuha ang mahalon niining Nokia nga cellphone nga nagkantidad og P5,000.

Matud pang Bayabado nga igo ra siyang naningil sa utang nga P50,000 ni Bohol sa iyang agalon nga iyang giila sa ngalan nga si Elsie apan gumikan sa kagahi niini mobayad iya kining nasagpaan maong siya gipadakop niini.

Si CCPO director, Sr. Supt. Patrocinio Comendador nagkanayon nga gikunsidera nila karon si Bayabado nga “possible suspect” tungod kay giingong duna kini gibuhiang pamahayag kang Bohol.

“According to report, that he threatened the victim(Bohol) that if he do not give in to the demand basin maparehas iyang fate adtong nursing student,” asoy pang Comendador.

Gipaabot nga ipakita si Bayabado sa bugtong testigong kauban ni Ruba atol sa pagkahitabo samtang gamiton usab nga circumstantial evidence ang pamahayag unya ni Bohol kung mokooperar kini.

Sa pagkakaron, kasong robbery-extortion ang ipasaka sa Mandaue City Police Office batok kang Bayabado.