Awhag pag-armas sa tanod nabuhi

Pabor na si Cebu City ABC president Eugenio “Jingjing” Faelnar nga padalhon og armas ang mga barangay tanod sa dakbayan atol sa ilang duty.

Ang nahisgutang lakang maoy sugyot kaniadto sa iyang bisi presidente nga si Pahina Central barangay captain Sisinio Andales.

Niingon si Faelnar nga siya wala mosuporta sa maong sugyot kaniadto tungod kay wala pa kinahanglana sa mga barangay tanod ang pagdala og armas.

Apan naobserbahan sa ABC president nga lahi na ang sitwasyon karon, tungod kay ang mga tulisan giingong mamusil na sa ilang mga biktima.

Labing bag-o niini niingon si Faelnar, mao ang gidangatan sa usa ka tinun-an sa nursing sa Cebu Doctor’s University nga gitulis ug gipatay.

Ang biktima nga si Ruby Jade Ruba, gitakda untang mugradwar sa hinapos nga bahin niining buwana, apan kini dili na mahinayon tungod sa iyang gidangatan.

Tungod niini, gipadayag sa ABC president nga gikinahanglan nang padalhon og armas ang mga tanod, nga mutabang sa kapulisan pagpatunhay sa kahusay ug kalinaw sa dakbayan.

“Lisod man kaayo nga mo-roving ang atong mga tanod, unya ug makasugat sila og tulisan, unsaon man nila pagdakop,” sumala ni Faelnar.

“Makabawos kaha sila og walay armas kung maoy pusilon sa mga suspetsado nga mamusil na man ron ang mga tulisan,”dugang pasabot sa ABC president.

Ang Police Coordinating and Advisory Council (PCAC) diin sakop si Faelnar,  iyang awhagon nga paluyuhan ang iyang tinguha.

Kini pinaagi usab sa usa ka resolusyon nga ipalabang sa ABC president, atol unya sa ilang sinimanang tigom sa PCAC sunod semana.