Nagduwa’g armas tipi

Menor de edad nga giingong sakop sa usa ka gang ang namatay human kini magduwa og pusil samtang nakig-inom sa iyang mga kauban diha sa taytayan sa dalan Bonifacio sa barangay Tinago kagahapon sa kaadlawon.

Nakabsan sa kinabuhi sa Cebu City Medical Center (CCMC) ang 16-anyos nga batan-on(ngalan gipugngan) tungod sa usa ka balang miigo sa iyang tuong tampihak nga milapos sa pikas sa giduwaang .38 rebolber.

Sa imbestigasyon nila ni SPO2 Rey Cuyos sa Homicide Section base sa gitug-an sa mga higala nag-Russian Roulette.

Matud pa sa mga batan-on nagpaabot sila sa binong ilang gipapalit sa mga kaubang miyembro usab sa gang dihang giibot sa namatay ang paltik nga .38 ug gipakita kanila.

Human niini ang biktima mikuha’g bala sa gamay’ng pitaka ug gisulod kini sa tambor ug nagkanayon nga “ Kini, refill ni, di na mobuto.”

Ang kinse anyos nga kauban niini gikatahong mibadlong kaniya pag-ingon “ayaw pagbinuang ana bay” apan gituyok niini ang tambor ug gition sa ulo.

Sumala pa niini nga iyang gitambagan ang biktima nga ibutang ang armas apan kalit lang kining nibuto ug nahagba, ang laing kauban nila maoy nipunit sa armas ug gidala kini sa tambalanan apan namatay gyud kini.Ang mga higala sa biktima gipaubos usab sa paraffin test sa kapulisan aron masuta kun nakapabuto ba sila og armas.