Mga punoan sa marijuana 'larot

Mokabat sa 10 mil ka mga punoan sa marijuana ang gilarot  ug gisakmit sa gilusad nga pagpangronda sa kapolisan sa usa ka dakong plantasyon sa  marijuana didto sa bukirang bahin sa Sitio Butong barangay Basiao lungsod sa Badian niadtong Huwebes sa alas 2  sa kaadlawon.

Ang nasakmit sa kapolisan nga mga punoan sa marijuana gilangkoban kini sa 5 mil ka mga fully-grown kun anihunon na nga mga puno-an ug laing  5 mil ka mga bag-o pang gipananum nga marijuana.

Gibutyag ni PO1 Ivan Ray Juarez sa Badian Police Station dihang nahinabi sa Banat News nga ang maong plantasyon sa marijuana sa Sitio Butong nahimutang kini sa usa ka timberland.

Walay nasakmit nga caretaker o nanag-iya sa maong mga tanom sa marijuana gumikan kay walay tawo sa maong lugar dihang  miabot ang mga sakop sa kapolisan pinangulohan ni PO3 Olderico Lamosao.

Gibutyag ni PO1 Juarez nga dunay mipadangat nila og impormasyon kabahin sa plantasyon sa marijuana sa maong lugar hinungdan nga gilusad dayon nila ang operasyon ug positibo ang resulta niini. (Darrel A. Carumba)