Mokabat sa P150,000 ang kinatibuk-ang danyos lakip na ang sakyanan human maugdaw sa sunog ang usa ka balay nga ginama sa mixed materials kagahapon sayo sa buntag diha sa sitio Oprra, barangay Kalunasan ning dakbayan sa Sugbu.
Giingong nagsugod ang kalayo diha sa grahi-an sa balay nga gipanag-iya ni Benita Albino ug daling mikuyanap ang kalayo ngadto na sa balay niini.
Si Fire Chief Investigator Allen Arciaga nga nahinabi sa Banat News mitug-an nga ilang nakontrolar ang sunog sud lang sa tres minutos ug wala na kini makakatap pa og laing balay nga gipaubos lang sa second alarm.
Naapil usab pagkaugdaw ang Toyota Revo nga gipanag-iya sa pamilyang Albino. Nadawat ang alarma sa kabomberuhan alas 5:06.
Wala hinuoy gikatahong nasamdan sa nasunogan ingon man sa habig sa mga bombero.
Kini maoy ikaduhang higayon sud karong bulana nga dunay nasunog nga panimalay human gisaulog ang fire prevention month sugod niadtong Marso uno hangtud petsa 31.
Niadtong petsa 4 niining bulana diha sa Barrio Luz, usa ka balay ang nasunog apan nakontrolar lang usab dayon nga gipaubos lang sa first alarm.
Ang duha ka sunog nga nahitabo karong bulana padayon pang giimbestigar sa kabomberohan.