Opisyal sa Talisay CH nabiktima sa lungkab

Kalihim sa Sangguniang Panlungsod sa dakbayan sa Talisay ang nabiktima sa pagpanglungkab diin mikabat sa sobra P26 mil ang kantidad sa mga butang nga dala sa wala mailhing kawatan niadtong Martes sa kadlawon sa sitio Nonoc, Barangay Tabunok, dakbayan sa Talisay.

Ang biktima mao si Emigdio Enjambre Jr., 43-anyos,  residente sa maong barangay.

Base sa imbestigasyon sa theft and robbery section sa kapolisan sa dakbayan nga ang kawatan misaka sa koral sa balay ni Enjambre ug mipugos og abli sa pultahan sa kusina hinungdan nga nakasulod kini ngadto sa balay sa biktima.

Si Enjambre ang daling mitaho ngadto sa mga polis human sa maong hitabo.Nadala sa kawatan ang usa ka DVD player nga platinum brand  nagkantidad og  P15 mil, Reebok nga sapatos, P4 mil, Casio nga relo sa babaye, P3,500, Ipod speaker, P1,000, perfume, P300, mga delata nga wala mapiho ang kantidad ug BMX nga bisekleta, P3 mil.

Sa laing bahin, base sa talaan sa TRS mokabat sa 50 ka insidente sa tulis, kawat, lungkab ug pagpangilad ang nahitabo sa dakbayan sa Talisay gikan niadtong buwan sa Oktobre hangtud niining buwana.

Apan niining bag-o lang ang hepe sa kapolisan sa dakbayan Police Superintendent Romeo Perigo ang nagkanayon nga mikunhod ang insidente sa tulis diha sa kadalanan sa dakbayan tungod sa subsub nilang pagpahigayon og check points.

Bag-o lang nga  ang kapolisan sa dakbayan adunay mga nasakmit nga mga motorsiklo tungod kay ang mga nagsakay niini wala makapakita og mga dokumento.

Matud sa hepe nga pangsitahon nila ang mga motorsiklo sa ilang pag-check point tungod kay kasagaran mao kini gamiton sa mga dautang tawo ilabi na sa mga tulisan kung magbuhat sila og krimen.