Trak natagak, 1 tipi

Usa ang namatay ug naputol pa gyud ang bukton ug laing unom pa ang naangol sa pagkalimbuwad sa usa ka trak de karga nga puno sa mga utanon nga nisablay sa punoan sa lubi ug mahogany  sa kurbadahun nga dapit sa barangay Abugon lungsod sa Sibonga  alas 4:00 sa hapon niadtong miaging adlaw.

Ang namatay giila sa kapulisan nga si Esperidion Quibedo,40, minyom molupyo sa barangay Caliryuhan, Dalaguete ug truck boy  human matagak ang sakyanan sa bung-aw.

Samtang ang unom pa ka mga na-angol giila nga sila si Apolonia Quibedo, 39, taga Caliryuhan, Dalaguete, Marcial Asenjo, 45, Caliryuhan Dalaguete, Allan Dicdican, 33, taga Lanao Dalaguete, Danilo Neri, 37, taga Naljo Dalaguete, Cristita Quibedo, 45, Caliryuhan Dalaguete ug Andres dela Peña,18, taga Mantalongon, Dalaguete.

Samtang ang drayber sa maong trak  naila nga si Leonardo Nepumuceno, 48, taga Saksak Dalaguete   nga igo lang nakaangkon og gamay’ng samad sa iyang tuo nga kilay.

Maayo nalang gani kay nasangit ang maong trak de karga sa punoan sa lubi ug mahogany hinungdan nga wala kini malahos og katagak sa ubos nga bahin.