Drayber nga dispatser gipusil sa Mandaue

Maduguon nga panghitabo sayo sa buntag kagahapon sa dakbayan sa Mandaue human ang usa ka dispatser sa PUJ ang gipusil patay sa duha ka wala mailhing mga tawo.

Nahitabo kini pasado alas 6 atubangan sa Rose Pharmacy sa may M.C Briones Highway Guizo sa maong siyudad.

Ang biktima nailhan lang sa kapolisan sa pangan nga Jerame Guba, base sa nakuhang Temporary Operators Permit (TOP) diha sa iyang bulsa ug walay tinong pinuy-anan.

Si PO3 Herbert Pelayo nga gikahinabi sa Banat News mitug-an nga base sa nahipos nga kasayuran sa wala pa mahitabo ang pagpamusil, ang biktima iyang gikalalis ang duha ka wala mailhing tawo.

Apan sa tanto nilang panaglalis ang usa sa duha ka mamumuno nibunot sa dala niining wala matinong kalibre sa armas dayong pusil ngadto sa biktima katulo ka   higayon kinsa naigo diha sa walang dughan, abaga ug paa nga maoy hinungdan sa hinanaling kamatayon sa biktima.

Ang kapolisan sa presinto  Uno  napakyas pagsikop sa mga gikatahapan kinsa dali usab nga misibat palayo sa lugar human sa krimen.

Dunay pagduda ang kapolisan nga usa ka drayber og PUJ ang biktima  ug kasamtangan lang unang nag dispatser diha sa nahisgutang lugar tungod sa nakuhang TOP.

Ang kapolisan padayon pang nag-imbestigar aron mailhan ang duha ka mamumuno. (Rey B. Pasaporte ug Romeo Limpangog)