Sikyu nanulis, nakapatay

Nasikop sa kapolisan sa dakbayan sa Sugbu ang usa ka security guard human kini manulis ug nakapatay sa iyang gibiktimang tindero sa litson manok ug baboy niadtong Domingo sa gabii diha sa Gov. Cuenco Ave.,  Barangay Banilad.

Ang suspetsado kinsa naa pa karon sa Cebu City Medical Center (CCMC)  nagpatambal sa iyang samad sa ulo human kini moambak sa kanal dihang gisikop sa kapolisan giilang si Danilo Torrenueva, 38, minyo, usa ka security guard sa Assault Security Agency and Allied Services Inc. residente sa  barangay Bug-ot,  Argao, Cebu.

Samtang ang gibiktima nga gideklarar nga dead on arrival sa   Don Vicente Gullas Hospital giilang si Ruel Absin, 19,  ulitawo, lumad nga taga Guihulngan,  Negros Oriental, usa ka stay-in worker sa Riza’s Lechon Manok and Baboy nga nahimutang diha sa Banilad Road.

Sa imbestigasyon nilang SPO1 Jay Yballe sa Homicide Section sa Cebu City Police Office ang suspetsadong si Torrenueva  miabot kini sa nahisgutang tindahan mga  alas 9: pasado niadtong Domingo sa gabii ug mi-order kini og litson manok ug puso.

Base sa imbestigasyon  nga ang kauban niining trabahante nga si Benji Bitoohan, 18,  nga taga Talibon Bohol, miasoy sa kapolisan nga human mo-order ang akusado miadto siya sa pikas nga tindahan nga dili lang usab layo sa dapit aron magkuha'g puso gumikan kay nahutdan sila niini.

Apan sa iyang pagbalik mao nalay iyang nasugatan nga nagdagan ang biktimang si Ruel nga nagkadugo na ang dughan niini ug miingon nga “gitulis ko Jie,  gipusil ko anang tawhana” nga nagdagan usab padulong kaniya.

Sumala  sa kapolisan nga iya untang gisuwayan og babag sa testigo ang suspetsado apan gitionan naman hinuon siya sa dala niining pistola  hinungdan nga  mikaratel lang usab siya'g dagan.

Ang suspetsado mipadayon kini sa pagdagan labang sa Mahiga Bridge samtang ang biktima kinsa nakaangkon og samad pinusilan sa iyang tuong dughan ug pulso gidala sa tambalanan apan nakabsan sa kinabuhi.

Apan pipila ka oras ang suspetsado nasikop sa mga  miresponding sakop sa Mobile Patrol Group nga gipanguluhan ni PO1 Alfredo Ursal Casas human kini masigpati diha sa may St. Michael Village sa Banilad.

Ang suspetsado matud pa sa kapolisan nga sa dihang nasigpatan sa MPG kalit kining midagan ug  miambak sa usa ka kanal hinungdan nga   maayong pagkagisi sa ulo ingon man samad sa nagkadaiyang  parte salawas.

Na-recover sa posesyon  sa akusado ang usa ka  .38 rebolber nga pistola (Armscor 202) usa ka kabhang ug tulo ka mga buhing bala, cash nga mokantidad  og P1, 650.

Sa inventory sa kapulisan uban sa tag-iya sa maong tindahan nga si Rodesa Rosales, nasuta nga nahanaw ang 2,000 nga halin.Ang hepe sa Homicide Inspector Mario Monilar  mipadayag sa media nga kasong robbery with homicide ang ilang ipasaka batok sa akusado.

Dugang pa niini nga base sa ilang impormasyon ang akusado sugarol kini ug kanunay nga walay kuwarta hinungdan nga nagtuo sila nga  kini ang iyang hinungdan nga nanulis kini.

Sutaon usab nila ang security agency niini   aron masuta kun sa  Armscor ba gayud ang armas nga gigamit niini atol sa pagpanulis.

Hinuon iyang giklaro nga wala nila ikahinabi ang akusado kini tungod kay ubos sa  balaod aduna kini  katungod sa  dili pagtubag samtang wala kini  abogado.