Hepe sa CIDG-7 hulipan og bag-o

Duna nay bag-ong hepe ang Criminal Investigation and Detection Group-7 ug hulipan na si Sr. Supt. Jorge Corpuz kinsa duha na ka tuig nga naghupot sa maong pwesto.

Ang mohulip kang Corpuz karong adlawa mao si Sr. Supt. Zoilo Lachica, Jr. kinsa pormal nga moasumir karong adlawa diha sa ilang buhatan sa CIDG-7 sa Camp Sotero Cabahug.

Ang pagbutang kang Lachica panguluhan mismo sa nasudnong director sa CIDG nga si Chief Supt. Raul Castañeda kinsa mao usab ang pormal nga mibutang kang Corpuz dinhi sa Sugbu duha na ka tuig ang nakalabay dihang kini pa maoy deputy chief sa CIDG.

Si Lachica maoy kanhi hepe sa Regional Intelligence Office sa National Capital Region sa Intelligence Group sa kapolisan.

Si Corpuz nadestino dinhi niadtong Marso 24,2006 ug sa iyang termino naka-serve ang CIDG-7 og 66 ka mga search warrants ug daghang high profile crimes ang nasulbad.

Sa termino ni Corpuz nasulbad ang kaso pagpatay kang Bantay Dagat Commission chairman Elpidio “Jojo” Dela Victoria; kanhi mayor sa Sta. Fe nga si Rogelio Illustrisimo; Hapones nga sila si Taro Suda ug Hiroshi Kusaka; pagkasikop sa usa ka miyembro sa New People’s Army nga nangilkil sa habagatang bahin sa lalawigan.

Matud pang Corpuz bugtong wala pa nila masulbad mao nalang ang kaso sa OFW nga gitulis ug gipatay diha sulod sa usa ka hotel sa dalan Salinas Drive.

Atol usab sa termino ni Corpuz dul-an usa ka gatos nga kinarnap nga mga sakyanan gikan sa Mindanao ug Manila ang narekober dinhi ug nauli na ngadto sa mga tag-iya.

Mapasalamaton  si Corpuz sa mga lokal nga pangulo sa lalawigan ug sa dakbayan sa suportang nadawat sa CIDG-7 ug ingon man sa iyang mga sakop.

Si Corpuz gikatakdang ibalhin ngadto sa CIDG headquarters ug gipaabot nga mabalhin sa Region 11. Hatagan usab siya karong adlawa og Medalya ng Kasanayan ni Chief Supt. Castañeda.