Mayor nasuko sa drag racing sa brgy.

Gi-awhag ni Sibonga Mayor Lionel Bacaltos ang konseho sa lungsod nga mopalabang og ordinansahon aron hingpit nga magdili sa pagpahigayon og drag racing sa ilang lugar.

Si Mayor Bacaltos mihimo niining maong lakang human dunay unom ka tawo ang na-angol atol sa gipahigayung motor drag racing sa barangay Abugon niadtong Sabado sa gabii.

Ang mga nanan-aw na-angol human mabangga-i ni Jessie Solon ang 16 anyos nga bata nga nagbiseklita niadtong higayuna ug wala sab maka-control si Dante La Peña hinungdan nga gidam-agan niini ang pundok sa mga tawo nga nanan-aw sa gipahigayong drag racing.

Apan si  Bacaltos nipadayag atol sa interview sa Bantay Radyo nga wala siyay kasayuran sa maong panghitabo ug matud niya niadto lang siyang Domingo masayod sa nagpadayong illegal nga kalihukan diha sa iyang lungsod human sa hitabo.

Nunot niini nibahad si Bacaltos nga iyahang ipadakop ug bilanggoon kadtong mga mosalmot sa  drag racing sa ilang lugar.

Gipasabot ni Bacaltos nga gidili niya ang maong kalihukan sa ilang lugar tungod kay maghatag kini og peligro sa katawhan apil na sa mga mosalmot niini.

Samtang si PO2 Ederlino Bacusmo administrative officer sa Sibonga Police Station mibutyag dihang nahinabi sa Banat News nga dugay na silang nakadawat og direktiba gikan sa mayor pagpahunong sa drag racing sa maong lungsod.

Gani gidugang ni  Bacusmo nga mismo ang mga opisyal sa barangay Abugon ang gipahibalo na usab kini sa paghunong na sa mga drag racing nga himoon.

Nasayran nga ang barangay Abugon utlanan kini sa dakbayan sa Carcar ug sila si Dela Peña ug Solon nga maoy responsabli sa pagpahigayun og drag racing pulos kini molupyo sa Carcar.

Nasayran sab gikan ni  Bacusmo nga ang mga ginikanan nila ni Solon ug dela Peña nibisita sa ilang buhatan kagahapon ug nipasalig nga maoy mo-abaga sa gastuhan sa tambalanan sa upat ka mga biktima bugti sa dili na pagpasaka og kaso kanila.