3 polis nanirado sa presinto ipa-imbestigar

Gimando ni  Sr. Supt. Rodel Calungsod, director sa kapolisan sa Mandaue City Police Office  ang imbestigasyon sa tulo ka mga polis nga nag-duty sa Presinto 4 sa Casuntingan  nga gireklamo  kay nanirado sa police station.

Si Sr. Insp. Abrahan Ocampo, hepe sa Presinto 4 maoy gitahasan ni Calungsod sa pagpahigayon og imbestigasyon ug iduso ang resulta niini ngadto kaniya.

Ang tulo ka mga polis nga on-duty  nga gireklamo mao sila si PO3 Dexter Martin, desk officer on duty, PO3 Gregorio Sabal Jr. ug PO1 Leonar Ricaplaza nga nadistino sa patrol.

Ang nagreklamo sa tulo ka mga polis mao si Joel Batiancila Jr, 21, nga mialegar nga gitulis kini sa tulo ka wala  mailhing lalaki nga nagsakay og motorsiklo sa sitio Lunar Road ug eskina M.L. Quezon sa barangay Cabancalan sa maong dakbayan.

Si Batiancila nga stay-in worker sa metal craft shop sa maong lugar mialegar nga paingon kini nga magpa-load sa iyang cellphone dihang kalit lang nga gidasmagan sa pula nga motorsiklo ang iyang tiil.

Natumba si Batiancila ug gikuha sa tulo ka mga lalaki ang iyang cellphone ug salapi  dayon mipahilayo kini sa maong dapit.

Gitabangan kini sa milabay nga traysikol drayber sa maong lugar ug gidala sa labing duol nga police station sa Presinto 4 apan dako ang katingala sa biktima kay nanirado ang mga polis sa maong presinto.

Gikandadohan ang pultahan ug gipawong ang suga  ug sa dihang iyang gisampit walay polis nga mitubag kaniya.