4 anyos gidaro sa motorsiklo

Pangos ug bun-og sa kalawasan lakip ang ulo sa usa ka 4 anyos nga batang babae human kini madasmagi og sakyanan  sa Barangay Day-as lungsod sa Cordova.

Ang biktima mao si Rosalyn Pogoy, 4 anyos ug residente sa Barangay Day-as lungsod sa Cordova.

Base sa imbestigasyon ni SPO1 Ebenezer Cadiliña sa Cordova police station nasuta nga samtang luwan sa iyang motorsiklo si Jee Parantar, 26, ug lumad sa Barangay Basak dakbayan sa Lapulapu padung sa tumoy sa  barangay Day-as ang bata mikalit kini og labang hinungdan nga nadasmagan kini sa iyang motor.

Gumikan sa mga pangos ug bun-og sa kalawasan sa bata lakip na ang gisi sa  ulo gidali kini og dala sa Lapulapu District hospital ug hinuon luwas  na kini sa makuyaw nga kahimtang matud pa sa amahan sa bata, mitabok kini human nga nangayo kini og kwarta ngadto kaniya nga atua sa tabok sa maong dalan.

Hinuon mipasalig si Parantar nga moabaga sa tanang galastuhan sa maong bata sa pagpatambal niini ug uban pang medical test nga pagahimoon ngadto sa bata.

Kagahapon pormal na nga gibuhian sa kapolisan si Parantar human sa maong sabotsabot sa mga ginikanan sa bata.