Gwardiya, Pumpboys Gigaid

Guwardiya ug mga pump boys sa   gasoline station gipanggapos  sulod sa kasilyas sa miaging gabii sa dalan  national  sa barangay Labogon, dakbayan sa Mandaue.

Ang gigapos ug gisirad-an sa sulod sa pansayan nga guwardiya  mao si Royquen Entrampas, 30 nga taga Cambaro I sa dakbayan sa Mandaue.

Ang iyang mga kauban nga gisulod sa pansayan nga mga pump boys  sila si Glenn, 17,   nga  taga Compostela ug  Eduardo Cabale,  20, taga Pardo, dakbayan sa Sugbu.

Si SPO1 Edgar Pasaylo sa kapolisan sa Presinto 3 sa Basak Police Station nga nahinabi sa Banat News miingon nga upat ka batan-ong lalaki nga pulos naghupot og  wala matinong kalibre sa armas maoy nagtulis sa maong gasoline station.

Matud pa niya  ang cashier nga si Herman Molinas, 18, nga taga barangay Labogon   wala makalihok dihang   gitionan sa armas  sa mga tulisan.

Gikuha sa usa sa mga tulisan ang mokabat P23, 600 nga salapi nga gisulod sa kaha ug yano lamang nga nanglakaw pahilayo paingon sa lungsod sa Consolacion.

Si SPO1 Roberto Hugo nga maoy nangulo sa team sa kapolisan nga mitubag sa alarma nga nahinabi sa Banat News miingon nga atol sa pagtulis walay gidalang armas ang guwardiya sanglit gisulod man sa hunos sa cabinet.

Matud pa niya nga gisuwayan unta nila og gukod ang mga tulisan apan wala na nila igkita.