Natagakan og ligid Inahan, anak naangol

Kritikal ang kahimtang sa inahan ug anak nga nagsakay og motorsiklo human kini natagakan  sa reserba nga ligid sa multicab   dihang ila kining gikasugat sa  diha sa National Highway barangay Dawis Norte lungsod sa Carmen.

Ang mga biktima giila sa kapolisan nga mao si Irene Cuyos, 51, anak niining si Joe Rene, 31, minyo, pulos residente sa barangay Tinubdan Daanbantayan.

Segun sa report sa Carmen Police usa ka Yamaha RS 100 gimaneho ni Joe Rene samtang nag-angkas usab ang iyang inahan paingon sa dakbayan sa Sugbu.

Apan sa ilang pag-abot sa naasoy’ng dapit ilang gikasugat ang usa ka multicab GXB 298 nga gimaneho ni Jovanie Letegio, 28, minyo, nga taga Tapilon Daanbantayan.

Sa wala damha kalit lang natagak sa karsada ang ligid nga gibutang sa atop sa multicab ug niuntol ug didto mopunta sa inahan ug anak kinsa wala na makalihay niadtong tungora.

Gumikan niini, nabuwag ug nangalagpot  ang inahan ug anak sa gibana-banang 75 metros ang distansya sa gisakyan nilang motorsiklo.

Parehong nakaangkon og daghan samad, bun-og sa kalawasan ingon man ang ilang ulo ang gidali paghatud sa Danao District Hospital apan gibalhin lang usab dayon sa Vicente Sotto memorial medical center alang sa dugang pag-atiman sa mga doktor.

Ang driver sa multicab misurender human sa hitabo.