2 konsehales sa Mandaue way staff

Duha ka konsehal sa dakbayan sa Mandaue nga sila si Majority Floor Leader Victor Biano ug Konsehal Emiliano Rosal ang nagpabilin nga walay kawani sa ilang buhatan nunot usab sa ilang gipaabot nga paghingpit sa katumanan sa legislative staff nga ilang gikinahanglan.

Sa nasayran sa Banat News nga sa kasamtangan maoy gipatabang ni Biano sa mga gimbuhaton ang mga staff sa iyang law firm ug dad-on usab ni Konsehal Rosal iyang gimbuhaton sa konseho sa ilang panimalay.

Ang wala pagbaton og mga kawani gikan sa kagamhanan sa dakbayan nila ni  Biano ug Rosal maoy dakong sukwahi sa pipila nila ka mga kauban kinsa nagbaton og mga job order  nga gihatag ni Mayor Jonas Cortes.

Naglakip sa  nagbaton og mga job order sa city hall  mao sila si Konsehal Beethoven Andaya nga adunay upat, Jefferson Ceniza nga adunay unom, Diosdado Suico nga adunay upat ug pito usab kang Konsehal Jimmy Lumapas.

“It is not Jonas money, It is the people’s money and we need a staff to serve the people better and receiving program employees does not mean nga naa na sila sa administrasyon,” matud pa ni Biano nga gikahinabi sa mga tigbalita.

Gipasabot ni Biano nga gipili niya nga dili mangayo og kawani sa iyang buhatan sanglit isip oposisyon dili siya buot nga makautang og kabubut-on.

Dugang pa niya nga sa panahon sa kampanya dihang nagpapili pa sila sa maong katungdanan wala usab siya gisaaran sa pagpatrabaho aron lang modaug sa miaging piniliay.

Samtang si Rosal sa iyang pagpamahayag miingon nga wala siya mangayo og mga job order nga idestino sa iyang buhatan sanglit ang Human Resource Management Office (HRMO) adto modestino  og secretary sa Sangguniang Panglungsod ug dili kanilang mga konsehal.

Kahinumdoman nga gi-veto ni Mayor Cortes ang ordinansa nga gipalabang sa konseho nga naghatag og pagtugot alang sa pagbaton sa mga konsehal og ilang mga legislative staff apan gi-override usab kini sa mayoriya.