Salapi, cellphone, pistola sa interior designer nahanaw

Nahanaw ang salapi nga wala pa matino ang kantidad, cellphone ug pistola sa gipatay nga interior decorator ug landscaper nga si Alexander Deen, 37, kinsa napalgang patay sulod sa pansayan sa iyang gipuy-an sa Highway, Tipolo, dakbayan sa Mandaue.

Si SPO3 Arriston Bataluna sa City  Intelligence Detection and Management Bureau (CIDMB) sa Mandaue City Police Office (MCPO) sa follow up kagahapon sa Banat News maoy mipadayag niini.

Ang tulo nga gipasakaan sa maong mga kaso mao sila si Albert Angga alyas Titat, 24,  Wilbert Obaniel alyas Wilwil, 19 ug Balogdo Otto nga  pulos taga Lorega, San Miguel, dakbayan sa Sugbo.

Si  Angga ug Obaniel ilang nadakpan sa follow up operation   sa Sitio Crossing, sa barangay Balud, lungsod sa San Fernando apan  ang ikatulo nga maoy mastermind nga si Otto nga nakasibat  padayon pa nga gipangita sa mga polis.

Matud pa ni SPO3 Bataluna nga si Otto nga maoy gialegar sa duha ka dinakpan nga sila Angga ug Obaniel     gituohan sa kapolisan nga nakasibat pahilayo gawas na dinhi sa lalawigan sa Sugbo.                                                                                                                                 

Dugang pa niya nga si Otto maoy gitumbok sa duha ka dinakpan nga maoy mastermind sa pagpatay sa biktima sanglit mao kini ang naggapos nga gipabinaklid ang biktima.                                  

Gitataw ni SPO2 Bataluna nga base sa autopsy sa PNP Crime Laboratory maoy ilang nasuta nga walay samad sa kalawasan sa biktima ug maoy ilang pagtuo nga namatay kini dihang gibaatan ang baba ug ilong ug wala na makaginhawa. (Romeo T. Limpangog)