Rally wa katarog ni Gloria

Liboan ka mga raliyista sa kaulohan ang mitambong sa interfaith rally nga nanawagan sa kamatuoran ug pagpakanaog kang Presidente Gloria Macapagal Arroyo, apan dinhi sa Sugbu daw wala nay gana ang kadaghanan ilabi na sa habig sa simbahan sa pagsalmot sa susama niining mga kalihukan.

Gibana-bana sa kapolisan sa kaulohan nga mokabat sa 15 mil ka tawo ang nitambong pagka-alas 4:30 sa hapon apan ang mga organizers nangangkong 75 mil ka tawo ang nikuyog sa maong protesta nga may temang “Manindigan para sa Katotohanan, Katarungan at Pagbabago.”

Apan dinhi sa Sugbo pipila lang ka militante ang mimartsa ug mipahigayon og rally diha sa Fuente Osmeña Rotunda, gilangkuban sila sa pundok sa Alliance of Progressive Labor, Bisig, Akbayan, Anakbayan, Sanlakas, Bayan ug ingon man mga subgroups.

Ang martsa sa Sugbu gisugdan pasado ala-una gikan sa downtown Colon ug atbang sa Sacred Heart School for Boys sa barangay Carreta ug  nag-abot diha sa Fuente Rotunda diin dunay entabladong gihimo alang sa pagpadayag sa mga mamahayag.

Sumala pa ni Sr.Supt. Patrocinio Comendador ang nagmartsa nidaghan lang nianang  pasado alas-dos sa hapon diin mikabat kini dul-an sa 700 apan nangangkon usab ang mga militante nga milapas sila og 1,000.

Nianang pagka-alas 4 inanay nga namauli ang mga militante hangtud nga nikubos kini ngadto sa gibana-banang usa nalang ka gatos hangtud sa natapos kini, nimugna hinoon kini og grabeng traffic.

Ang kapolisan sa Sugbu mipatuman og maximum tolerance samtang nibutang usab og children’s center ang Department of Social Welfare –7 uban sa mga social workers sa dakbayan aron proteksyonan ang mga bata.

Si Jaybee Carillo, tigpamaba sa DSWD-7 mitug-an sa Banat News nga katungod sa ginikanan nga mopadayag sa ilang sentimiyento apan dili kinahanglang ibutang nila sa peligro ang kinabuhi sa ilang mga anak.

Kagahapon gikumbinsir sa mga social workers ang inahan nga ibilin lang ilang mga anak sa gihimo nilang children’s playground nga may mga duwaan, gatas, biskwit, tubig, pagkaon ug mga social workers nga nagbantay samtang  sila mag-rally.

Dunay napulo ka mga bata pipila kanila mga masuso ang gidala sa maong children’s center apan duna pay daghang mga kabataang wala mokuyog sa mga social welfare ug naglikay-likay lang kanila atol sa rally.

Sa kauluhan, gipanguluhan nila ni kanhi presidente Corazon Aquino ug Joseph Ejercito Estrada ang mga nagprotesta sa Makati City nga gilangkuban sa mga business groups, tinun-an, walhong mga militanteng pundok ug ubang relihiyosong pundok.

Lakip sa nanambong mao mga kanhi opisyales sa gobiyerno ug lakip na ang taga oposisyon, Teofisto Guingona; Mayor Alfredo Lim; Mayor Jejomar Binay; Novaliches Bishop Teodoro Bacani; Lingayen-Dagupan Bishop Oscar Cruz ug ingon man si ZTE witness Rodolfo “Jun” Lozada kinsa ni-estorya sa entablado.

Nangangkon si Bagong Alyansang Makabayan (BAYAN) chief, Renato Reyes sa ABS-CBN nga mao na kini ang labing dakong pwersa pagpadayag batok kang Arroyo.

Samtang dinhi sa Sugbu, si Arman Perez sa Bayan naglaom nga duna pay mosunod nga halapad nga protesta hangtud nga matangtang sa pwesto si Arroyo.