Mitulis-mipatay sa arkitek nadakpan sad

Suspek sa pagtulis ug pagpusil patay sa usa ka arkitekto niadtong milabay’ng tuig nadakpan sa kapolisan kagahapon diha sa iyang balay sa sitio San Antonio de Padua sa barangay Inayawan human gialarmang nagbitbit og granada.

Ang nadakpan giilang si Alberto Baloyos, 20, giingong miyembro sa gang nga nalambigit sa mga krimen sa maong barangay ug gitumbok nga maoy mitulis sa manag-uyab nga sila si Architect Jun Elmer Satera ug Lady Caballero niadtong Hunyo 15 sa milabay’ng tuig.

Sumala pang Chief Insp. Aureo Sanchez, hepe sa Pardo Police Station nakadawat sila og tawag gikan sa usa ka concerned citizen kabahin sa usa ka lalaking nagbitbit og granada diha sa maong dapit.

Dihang ilang girespondehan gikatahong mitago kini sa lawak sa inahan niini diha sa ilang balay hinungdan nga ilang gisulod ug diha na nila madakpi ug nakuhaan og usa ka paltik nga kalibre.38 rebolber nga snub nose nga may mga buhing bala.

Si Baloyos gilambigit na sa ubang mga pagpamusil ug krimen sa nahisgutang barangay lakip na niini ang pagpusil sa usa ka polis niadtong 2005 nga si SPO1 Alex Racaza niadtong Enero 5, 2005 dihang usa pa kini ka menor de edad.

Niadtong milabay’ng tuig gitumbok kining maoy mitulis sa manag-uyab nga Satera ug Caballero diha sa Greenfields, Inayawan sa kaadlawon.

Nasuta nga si Satera igo rang nanalipod sa uyab apan gipusil kini ni Baloyos sa nawong hinungdan sa kamatayon niini una pa nila labnota ang bag ni Caballero nga gisudlan og ATM, ID, P200 ug payong.

Gipanghimakak hinuon kini ni Baloyos tungod kay wala na siya dinhi dihang nahitabo ang tulis ug nagtago na siya sa Amparo, Maasin Leyte ug ning bag-uhay palang nakabalik tungod sa hangyo sa igsuon.