Detinado nasaypan pagawas mitahan

Detainee nga nasaypan ug maoy napagawas sa polis sa Fuente Police Station mitahan kagahapon sa kaadlawon human kumbinsira sa iyang inahan samtang gipaabot nga gaan ra nga silot ang ipahamtang sa policewoman nga nasipyat pagpagawas kaniya.

Ang mitahan human sa pagtago-tago gikan sa kapolisan mao si Edward Cabrera Talingting, kinsa didto diay magtago sa barangay Malubog sa dakbayan sa Danao sukad niadtong Pebrero 26.

Si Talingting nakagawas sa Fuente police detention cell niadtong hapon sa Pebrero 26 human masipyat si PO1 Eva Caminade pagpagawas kaniya dihang kini maoy nitubag nga siya si “Chito Cabrera.”

Si Chito Cabrera dinakpan ug nabilanggo diha sa Fuente tungod sa paghubog-hubog nga paglapas sa City Ordinance 512 ug gimandong pabuhian na kini human makabayad og multa.

Apan nasuta nga napagawas na si Chito Cabrera niana pang buntag sa usa ka PO1 Dicdican human makabayad sa multa.

Matud pa nga dihang nangutana si Caminade kung kinsay “Cabrera” diha sa karsel mitubag dayon si Talingting ug dihang giusban og pangutana miinsister kining siya si Chito Cabrera maong gipapirma kini ni Caminade sa release paper ug diha sa blotter.

Si Talingting dinakpan sa mga sakop sa Regional Anti-Illegal Drugs Special Operations Task Force sa kasong paglapas sa Section 5 Article 2 sa RA 9165 kung drug pushing ug walay piyansang gitakda alang sa iyang temporaryong kagawasan.

Tungod kay walay prisuhan ang RAIDSOTF, diha lang una gidetiner si Talingting sa Fuente samtang giandam pa ang kasong isang-at kaniya.

Si Chief Insp. Henry Biñas, hepe sa Fuente Osmeña Police Station mitug-an sa Banat News nga niadtong adlaw dunay siyam ka priso ang iyang karsel ug malisod gyud pagtimaan kung si kinsa ang matag usa.

Samtang si Sr. Supt. Patrocinio Comendador, director sa Cebu City Police Office mitug-an nga mag-agad lang sa imbestigasyon sa insidente ang kaso unyang mapasaka kang Caminade.

Si Talingting mitahan human kumbinsira sa iyang inahan ngadto kanila  nila ni Labangon barangay konsehal Ana Lozano ug Fabian Aves ug gi-turn-over ngadto kang PO3 Amid Lozano sa Regional Intelligence Division kagahapon sa kaadlawon. (Edwin Ian Melecio)