6-Anyos gi-rape sa silingan

Usa ka 6- anyos nga batang babaye naghubag ang kinatawo ug naglain ang lawas pipila ka adlaw human giingong gilugos sa usa ka lalaki nga iya ra usab nga silingan didto sa barangay Rosario, siyudad sa Bogo niadtong milabay’ng adlaw’ng Sabado.

Apan ang iyaan sa 6 -anyos nga biktima nga si Julieta (apelyido gipugngan) 50,  minyo ug molupyo sa nahisgutang lugar niadto pang adlaw’ng Lunes nakadiskobre  sa gihimong pag-among-among sa iyang pag-umangkon ug midangop kini sa kapolisan sa maong siyudad.

Gibutyag ni SPO3 Edgardo Terol sa Bogo City Police station dihang nahinabi sa Banat News subay sa gihimong pagsukitsukit sa iyaan sa biktima iyang namatikdan nga nagluya ang iyang pag-umangkon nianang pagka Domingo ug nagsige kini og reklamo sa pagsakit sa iyang kinatawo.

Sa dihang gisusi sa iyaan namatikdan niini nga dunay dugo ang kinatawo ug naghubag kini ug duna pay lama sa white blood nga nabagtok.

Tungod niini nagduda ang iyaan nga gi-among- amongan gyud ang iyang pag-umangkon ug ang iyang gitumbok nga responsable  niini mao ang ilang silingan nga naila sa  ngalan nga   Tata.

Gitug-an ni Julieta sa kapolisan nga ang iyang pag-umangkon gidala kini sa pinuy-anan sa suspek niadtong Sabado ug gituohan niya nga gi-among-amongan kini niadtong higayona.

Matud ni SPO3 Terol gipaabot pa nila karon ang resulta sa medical examination sa bata aron maoy basehan pagpasaka og kasong pagpanglugos batok sa suspek nga gitago lang una ang pangalan pending sa imbestigasyon nga gihimo aron mapasakaan og pormal nga kaso sa korte.

Dugang nahipos nga kasayuran nga ang 6-anyos nga biktima anak kini sa gawas ug gibilin lang sa iyang iyaan.