Tinai sa 73-anyos nahabwa

Nakit-ang patay ang usa ka 73 anyos nga tigulang lalaki nga nahabwa na ang tinai  human kini gitigbas sa tiyan sa sitio Busay barangay Kinawayan, lungsod sa San Remegio, Cebu niadtong Lunes sa alas 6 sa buntag.

Ang biktima giila sa kapolisan nga si Felimon Ganar, 73, molupyo sa nahisgutang lugar. Samtang ang suspetsado mao ang usa ka Francisco Ycot Jr. ug duha ka wala pa mailhing kauban niini.

Si Ycot nabalhog na karon sa detention cell sa San Remegio Police Station samtang padayon pang gipangita ang duha ka kauban niini.

Matud ni PO2 Herman Bulawit sa San Remegio Police Station sa dihang nahinabi sa Banat News subay sa gihimo nilang imbestigasiyon sa asawa sa biktima nga si Santiaga Ganar, nananghid ang iyang pag-umangkon nga si Edgar Pilapil  nga makigpanuroy sa biktima nianang pagka alas 7 sa gabii sa Domingo.

Apan wala na kini mopauli nianang pagka gabii hinungdan nga sa iyang pagmata pagkabuntag nagdali siya nga nanaug sa ilang panimalay aron sa pagpangita ug paghiabot niya sa silong nakit-an niya ang biktima nga nagbuy-od na sa yuta ug patay na.

Samtang nahibaw-an  niya nga ang iyang pag-umangkon nga si Edgar  nalandig usab kini sa Don Severo Verallo Hospital human maka-angkon og mga samad dinunggaban sa iyang kamot ug sa kilid nga bahin sa tiyan niini.

Nasayran gikan ni PO2 Bulawit nga kagahapong adlawa pormal nang napasaka sa kapolisan ang kasong murder ug attempted murder batuk sa suspek ug duha pa ka kauban niini nga padayon pa karong gipangita.

Sa paghimo ning balita naglisod pa ang kapolisan pagtumbok sa motibo sa maong krimen.