14 ka GRO sa Talisay sikop

Nasikop kagahapon sa kaadlawon sa gipahigayong pagpangronda sa mga polis sa dakbayan sa Talisay ang 14 ka mga babaye usa niini minor de edad  nga mihimo og law-ay’ng pasundayag diha sulod sa usa ka KTV  bar sa barangay San Isidro sa maong dakbayan.

Si SPO1 Glen Burlas, PO1 Stephen Sefuesca ug mga tanod sa barangay  mipahigayon sa maong pagpangronda diha sa EM’s KTV bar sa maong lugar.

Ang mga nasikop  temporaryo karong nadetiner sa detention cell sa siyudad.

Ang hepe sa kapolisan sa dakbayan Supt. Romeo Perigo   mibutyag nga ang maong kalihukan tubag sa awhag ni Bise Mayor Lani Abarquez ug sa mga sakop sa konseho sa dakbayan.

Kahinumduman nga si Abarquez nakadawat og taho kabahin sa maong KTV  bar diin adunay magpasundayag og law-ay ug iyang giawhag ang hepe sa kapolisan nga mopahigayon og aksiyon niini.

Ang kapolisan mipahigayon og usa ka semana nga pagpaniid pagpiho sa mga taho.

Si Perigo mibahad nga hangtod nga dunay mga KTV  bar sa dakbayan nga magpahigayon og mga law-ay nga pasundayag padayon sila sa ilang  mga pagpangronda.

Apan matud pa niini nga ang pagsikop sa mga babaye nga nagtrabaho sa KTV ug mipasundayag og mga law-ay dili maoy sulbad sa maong problema diin ang maong mga babaye biktima lang usab sa sirkumstansiya ug wala kini laing trabaho nga masudlan.

“Arrest is not the solution for that because everybody will need food, need money for their clothing, shelter, education mao nay atong nakita, they are not criminals they are victims of circumstances,”  si Perigo nagkanayon.

Si Perigo nagkanayon nga ang maong mga babaye mahimo kining sagakayon ug bansayon ngadto sa laing panginabuhian aron dili na kini mobalik sa law-ay nilang trabaho.

Apan ang hepe midungag nga ang maong mga babaye nga nasikop posibleng pasakaan nila kini og kasong kalapasan  sa balaod nga nagdili sa pagpasundayag og law-ay. Ang minor de edad itugyan sa Department of Social Welfare and Development.