Saway ni VM Rama girespeto

Padalhan og kopya ni Cebu City Police Office Chief Senior  Superintendent Patrocinio Comendador si Bise Mayor Mike Rama labot sa iyang programa nga “Polis sa Saringan Suod sa Katawhan” nga moduaw sa mga eskwelahan sa elementarya ning dakbayan.

Kini maoy gipasabot ni Comendador sa mga tigbalita subay usab sa pagsaway ni Bise Mayor Rama nga nag-usik-usik lang sa panahon ug kwarta  ang kapolisan sa dakbayan labot niini.

Matud pa niini nga iyang padalhan og kopya ang bise mayor aron mapasabot sa ilang tumong og tuyo sa maong programa nga maduol sa katawhan labi na ang pagsalig sa kabataan ngadto sa kapolisan.

Hinuon iyang gi-respito ang pagpanaway sa  bise mayor “the Cebu City Police Office respect the view of the vice mayor after all he is the second highest official of the city”.

Gisaysay niini nga dili gyud sila maoy nagpasiugda sa maong programa ug giimbitar lang sa usa ka tunghaan apan ilang nakita nga adunay positibong impact ngadto sa mga tinun-an hinungdan nga ilang gipadayon.

Ug gani aduna silay mga gi-pang bansay nga gikan sa Police Community Relation nga moabag sa kabataan sa pagpasabot niini sa mga tunghaan kini aron mahanaw ang pagkahadlok sa mga bata ngadto sa mga polis.

Gitataw usab niini nga ang mga patrol car nga gipasakyan sa kabataan anha lang kini sa mga vicinity sa tunghaan ug gamiton lang usab kun walay mga alarma nga respondehan.

Dugang pa niini nga target market gyud nila ang mga tunghaan gumikan kay nakita nila nga maayo kinig resulta ngadto sa mga estudyante ug mausab ang mga dili maayong pagtan-aw nila sa kapolisan. (Guam P. Logroño)