Posibleng wala nay mapahigayon nga bisan unsang drag racing diha sa South Road Properties kon SRP.
Kini human sa gipahigayong Mayor Tommy Osmeña Cup 6 National Drag Racing Competition niadtong Domingo.
Ang mga organizer nagplano paglusad og laing drag racing diha sa SRP human sa malampusong pagpahigayon niini pipila ka adlaw ang nakalabay.
Apan matud ni Mayor Tomas Osmeña nga siya nakadawat og mga reklamo labot sa panaghuot sa mga sakyanan paingon sa habagatang Sugbu.
Kini dihang gisirad-an ang SRP gikan sa mga motorista tungod usab sa pagpahigayon sa nahisgutang drag race.
“Probably not, because people are complaining that’s why not,” nagkanayon ang mayor dihang gikuhaan og reaksyon sa mga tigbalita.
Gitataw hinuon ni Osmeña nga dili siya maoy nagpasira sa SRP atol sa pagpahigayon sa drag race kun dili ang korte maoy nihatag og pagtugot niini.
“Remember that I’m in a court order not to shut down the road, so, how could I make it close for a drag race, as far as I’m concerned, I just put there, “no objection,” matud sa mayor.
Sa pikas bahin, gihimakak usab ni Osmeña nga siya maoy nagpasiugda sa drag race ug labaw nang iyang gihimakak nga siya maoy nag-organisar niini.
“That’s only sipsip on their part if they put my name of the trophy Mayor Tommy Osmeña’s Cup,” sumala sa mayor.
Nasayran gikan kang Osmena nga pipila ka mga investor nga dunay interes pagbubo og puhunan diha sa SRP dili gusto sa maong matang sa kompetisyon.
Sa kasamtangan, nagpadayon pa ang negosasyon sa mayor ug sa tulo ka mga investor alang sa pagpalit niini og luna diha sa SRP. (Elly Bolonos)