Gikan namisita gipatay

Batan-ong lalaki nga gituohang gikan   namisita sa iyang hinigugma niadtong Domingo sa gabii patay nang nakit-an nianang pagka-Lunes sa buntag human makaangkon og tulo ka samad dinunggaban sa tiyan ug dughan ug samad pinusilan sa bukobuko nga milapos sa tiyan didto sa barangay Basdiot, Moalboal, Cebu.

Ang biktima naila nga si Fely Dumasapal, 24,    ulitawo, usa ka panday ug molupyo sa nahisgutang lugar.

Gibutyag ni PO2 Edgar Mantalaba, imbistigador sa Moalboal Police Station dihang nahinabi sa Banat News subay sa ilang gihimong pagsukitsukit nakig-inom pa ang biktima sa iyang igsuon ug mga  higala pagka-adlawan nianang Domingo sa ilang pinuy-anan apan nilakaw kini human makadawat og text message.

Matud ni PO2 Mantalaba dugang nasayran nila sa igsuon sa biktima nga si Reslie mipauli pa ang biktima ug  mibalik sa pag-inom apan milakaw na usab kini pagbalik human makadawat og laing text message ug wala na mopauli pagka gabii.

Alas 7 na sa buntag niadtong Lunes nakit-an ang biktima nga naghigda sa dalan ug wala nay kinabuhi nga napuno sa samad dinunggaban ang ibabaw nga bahin sa tuong dughan, ubos nga bahin sa wala nga dughan ug tiyan ug laing samad pinusilan sa bukobuko nga milapos sa tiyan.

Dugang nahipos nga kasayuran sa kapolisan gikan sa mga tagtungod sa biktima gituohan nila nga namisita gyud kini sa iyang hinigugma nga naila sa pangalan nga si Daisy Rose Presiado tungod kay mao gyud kini  sagad niyang buhaton sa higayon nga molakaw sa ilang pinuy-anan.

Dugang mga tabitabi nga nahipos sa gihimong pakisusi sa kapolisan nga ang biktima wala kini mauyoni sa mga paryente ug pamilya sa hinigugma niini.

Matud ni PO2 Mantalaba   lima ka   paryente sa hinigugma sa biktima ang giimbestigar sa posibleng kalambigitan sa kamatayon ni Dumasapal.

Ang maong lima ka mga paryente sa hinigugma sa biktima nga gipaubos sa interogasyon sa kapolisan lumad  nga taga Negros apan mibisita sa maong lugar pagtambong og bunyag.

Apan gidugang ni PO2 Mantalaba subay sa gihimo nilang pagsukitsukit sa hinigugma sa biktima gihimakak niini ang maong pangangkon nga gikan nga namisita ang biktima sa ilang pinuy-anan nianang pagkagabii tungod kay matud niya dugay na silang nagkabuwag niini. (Darrel A. Carumba)