2 ka bagitong polis ‘nangulata’

Tulo ka bagitong polis nga midakop og usa ka lalaki tungod sa dispatching  gisumbalik usab og reklamo og pagpangulata sa ilang dinakpan diha sa barangay Mabolo.

Ang dinakpan giilang si Joseph Eugenio, residente sa maong dapit kinsa gisikop sa mga polis gumikan sa anti-illegal dispatching; Batas Pambansa Bilang 6 tungod sa pagluklok og gunting; direct assault to person of authority ug paglapas sa City Ordinance 1929 kon drunkenness.

Apan ang dinakpan sa iyang alegasyon mipa-blotter usab kini sa Mabolo police station ug mipasangil nga gikulata siya sa tulo ka mga polis nga miaresto kaniya sa walay igong hinungdan.

Giila ang maong mga polis mao sila si PO1 Julius Tampus, PO1 Christopher Sullano ug PO1 Rommel Goloseno.

Ang tulo pulos nadestino sa Mabolo police station alang sa ilang Field Training Program ug gitahasan niadtong adlawa sa pagbantay diha sa Carmelites Monastery diin gidala ang Pilgrim Relics of Saint Therese of Child Jesus.

Matud pa sa mga polis una na nilang gisitar si Eugenio tungod sa pag-dispatch niini diha sa maong dapit tungod kay mao kini ang nakaingon sa pagbara sa dagan sa traffic apan human badlunga og pipila ka minutos ang nakalabay mibalik na usab kini ug subling nanawag og pasahero.

Ning tungora giduol siya sa maong mga polis ug gibadlong apan gikatahong gisigahan hinuon og mata ang mga polis ug gipang-ingnan nga di siya mahadlok og polis sa Mabolo tungod kay karaan na siyang dispatser sa maong dapit ug daghang  kailang polis sa maong presinto.

Ning tungora giaresto sa mga batan-ong polis si Eugenio ug nasutang nanimaho kining bino ug dihang gikapkapan nahikapan ang gunting diha sa hawak niini.

Samtang ang maong mga polis mihimakak nga ilang gidagmalan si Eugenio ug nagkanayon nga nagsige og lugnot ang maong lalaki maong nabun-og og  maayo ang bukton niini sa sige nila og pugong.