Mga bata naa sa rally gahapon

Mga bata gikuyog atol sa martsa sa mga raliyista kagahapon atol sa paghinumdom sa ika-22 nga anibersaryo sa People Power Revolution niadtong Pebrero 25,1986. Ang mga bata nga gibana-banang nag-edad og nuwebe ngadto sa 15 anyos nagbitbit og mga placards nga nagsaway ug nag-awhag pagpakanaog sa pwesto kang Presidente Gloria Macapagal Arroyo.

Usa kanila kagahapon samtang nagpaabot sa pagsugod sa martsa diha sa Fuente Osmeña Rotunda nagsuot pa og maskara ni First Gentleman Mike Arroyo, dihang gipangutana sa mga tigbalita kagahapon sila parehong mitubag nga nakig-kausa sila pagpalagpot kang Arroyo tungod sa pagkakurakot niini.

Apan dihang gipangutana pag-usab kung kinsay nag-ingon nga nangurakot ang pangulo wala na makatubag ang mga bata ug nagdungan og lingi sa mga hamtong nga mga militante nga daw nagpatabang.

Hinuon ang kalihukan kagahapon malinawong nalusad ug natapos diin gibana-banang 500 ka tawo ang nikuyog (base sa ihap sa PNP) nga walay kagubot.

Si Arman Perez sa Bayan Muna sa pakighinabi sa mga tigbalita nagkanayon nga nakig-uban usab kanila ang mga drayber, vendors ug mga mamumuo.

Kabahin usab sa mga bata, si Glemmar Bacusmo nagkanayon nga wala nila kini pugsa pagdala kundili ang mismong ilang mga ginikanan ang nagpakuyog kanila.

Samtang ang lider sa Interfaith group Rev. Rey Gelloagan mitug-an sa Banat News kagahapon nga gipaabot nilang moabot si ZTE Broadband deal “whistleblower” Rodulfo Noel “Jun” Lozada karong Marso 1.

Matud pang Gelloagan ang martsa kagahapon agig paghinumdum sa Edsa One ug sa pagsuporta kang Lozada. Sumala pa niini nga ang pag-martsa sa kadalanan sama sa gihimo sa Edsa One mao nalay nahibiling pamaagi sa katawhan aron pagkab-ot sa kaangayan gikan sa abusado ug kurakot nga gobiyerno.

Miangkon hinuon siyang ang pangangkon nilang “katawhan” nga mialsa na batok sa gobiyerno wala mangahulugang tingog kini sa kinatibuk-ang Pilipinhon.

Sumala pa niini ang importante nga bisan duna ray usa ka tawong mangisog ug dunay diskuntento sa panggobiyerno angayan gyud kining paminawon.