Nalabay sa habal-habal patay

Patay ang usa ka batan-ong lalaki human malabay gikan sa habal-habal nga iyang giluwanan dihang kalit lang nga nasungag sa gikasugat nga pick up kagahapon sa kaadlawon sa sitio Tigbao, barangay Talamban, dakbayan sa Sugbu.

Ang namatay mao si Kiefer Arjer Flores, 18, nga lumolupyo sa Phase 1, Villa Leyson, barangay Bacayan, dakbayan sa Sugbu nga maoy pasahero ni Gerry Saruida, nagpuyo   usab sa maong lugar.

Si SPO1 Dionesio Galo sa traffic division sa Cebu City Police Office nga nahinabi sa Banat News miingon nga nagdagan subay sa dalan sa maong lugar ang habal-habal nga giluwanan ni Saruida ug Flores pauli sa ilang panimalay.

Sa ilang paghidangat sa maong dapit kalit lang nga nasungag sa Mazda pick up nga gimaneho ni June Centro nga taga Villa Leyson sa barangay Bacayan.

Nunot sa maong panagsungag ang backrider sa habal-habal nga si Flores nalagpot ngadto sa layo ug nadakdak sa sementadong dalan nga maoy nakaingon sa grabeng kadaut sa iyang kalawasan.

Si SPO1 Galo miingon nga awng duha dali nga gidala sa Cebu City Memorial Medical Center sa dakbayan sa Sugbu apan si Flores ang gideklarar sa mga doktor nga namatay.

Ang drayber sa pick up kinsa giingon nanimahong ilimnong makahubog gipaubos sa liquor test sa kapolisan kinsa gitanggong karon sa kapolisan.