Bodega gitulis sa lima

Mokabat sa 300 mil ka pesos ang kantidad sa nakuha sa unom ka mga tulisan atol sa ilang pagtulis sa usa ka bodega sa softdrinks diha sa sitio Ceres barangay Gun-ob dakbayan sa Lapulapu kagahapon sa buntag.

Ang biktima mao ang bodega ni Samson Go nga gibantayan sa iyang anak nga si Mildred Go Cubillan.

Matod pa ni Cubillan mga alas 8:00 kagahapon sa buntag samtang bag-o silang miabli sa ilang bodega, lima ka tawo ang misulod sa ilang bodega samtang ang usa nagpabilin sa usa ka taxi diin nagtoo sila nga mga kustomers nga mopalit og softdrinks o beer.

Sa dihang nakasulod na ang lima kalit silang mideklarar og tulis dala ang pagtion kanila og wala matinong kalibre sa armas.

Matud pa sa kapolisan dihang nagdumili si Cubillan pag-abli sa drawer nga gisudlan sa ilang halin gibukbok kini sa ulo ginamit ang armas nga gition kaniya sa usa sa mga tulisan.

Milampos gyud ang tulisan sa pagkuha sa balor P300 mil nga halin nila sa milabay’ng adlaw lakip na ang mga alahas ni Cubillan ug sa iyang inahan ug bana.

Ang mga tulisan gikatahong mieskapo sakay sa nagpaabot nga taxi nga letra ra sa plate number nga “GVT” ang nakuha apan wala ang numero niini.

Si SPO1 Andres Gahi sa Theft and Robbery Section mitug-an sa mga tigbalita nga di pa nila matino kung kinsang grupo ang mga gikatahapan.

Gipatan-aw na si Cubillan sa mga hulagway sa rogues gallery sa kapolisan ug  gikatakdang buhatan na og cartographic sketch.