Seaman misampak sa kahoy, patay

Usa ka seaman nga lumalargahay na og balik karun untang bulana ang namatay human madisgrasya samtang nagmaneho sa iyang motorsiklo didto sa highway sa barangay Bahay lungsod sa Sibonga, Cebu niadtong Huwebes sa alas 9:10 sa buntag.

Ang biktima naila nga si Marcelino Espina, 32, usa ka seaman ug molupyo sa barangay Bagacay sakop sa nahisgutang lungsod.

Matod ni PO3 Antonio Sanchez sa Sibonga Police Station dihang nahinabi sa Banat News gikan nga naghatod si Espina sa iyang duha ka anak nga nagtungha sa lungsod niadtong tungura ug paingon na unta kining mopauli.

Gibutyag ni PO3 Sanchez subay sa mga pamahayag sa mga nakasaksi sa hitabo kusog nga nagpadagan sa iyang Honda XR-200 si Espina  nga paghiabot niini sa barangay Bahay dunay gilihayan ang biktima hinungdan  nibangga  kini sa kahoy nga mahagony  sa daplin sa dalan.

Maayong pagkabunal sa ulo sa biktima nga wala usab magsul-ob sa helmet niadtong tungura ingon man nabanda usab ang lawas niini sa kahoy.

Ang mga niresponde  nga kapulisan nga gilangkoban nila ni PO3 Jimmy Raiz ug PO3 Estanislao Chaves mao nay naghatod sa biktima sa Deiparine Medical Clinic sa maong lungsod apan girekomendar kini nga ipabalhin sa South General District Hospital sa siyudad sa Naga apan dead on arrival (DOA) na kini paghiabot sa maong tambalanan.

Dugang kasayuran nga nahipos nga ang biktima gitakda na untang mobalik og sakay sa barko karong petsa 26 niining bulana.