Tulo ka batan-on may labot sa pagpatay?

Wala pa gihapon mailhi sa kapolisan sa Presinto 2 sa Subangdaku Police Station  ang tulo ka mga batan-ong lalaki nga gikatahong ulahing nakit-ang kuyog sa pagpauli sa  interior decorator  nga  mahuyang kinsa gigapos sa electrical wire ug patay na dihang nakit-an sa sulod sa pansayan sa iyang giabangang balay.

Si Senior Inspector Edelberto Castañeda nga nahinabi sa Banat News nagkanayon nga posibleng dunay kalambigitan ang tulo ka batan-on sa kamatayon ni Alexander Deen nga usa ka interior decorator ug designer nga taga Manila.

Si Dina Ledesma nga piniyalan sa Mercedes Arcade sa F. Franco Building sa Highway Tipolo sa maong dakbayan maoy nakakita sa pagpauli sa biktima niadtong Martes sa gabii nga kuyog ang tulo ka mga batan-on.

Apan pipila na ka adlaw ang nakalabay namatikdan ni Ledesma nga wala na niya makit-i si Deen sukad pa niadtong ulahi niya kining nakit-an niadtong Martes sa gabii hinungdan nga iyang gipahibalo ang ig-agaw ni Deen nga si Eric Deen.

Si Eric uban sa imbestigador sa kapolisan sa Presinto 2,  SPO2 Alfredo Andales maoy niabli sa lawak ug mao nalay ilang kakugang dihang mialisbo ang baho sa patay’ng tawo.

Diha nalang nila nakit-i ang biktima nga nag-ubo sa salog nga may gapos nga wire diha sa isig ka bukton diha sa pansayan ug gilangaw, wala pa hinuon gyud matino kung unsay gigamit pagpatay kang Deen sanglit walay nakitang samad sa lawas niini.

Gimando na nga ipa-awtopsiya ang patay’ng lawas sa biktima aron pagtino kung gidagmalan ba kini.