Drag Race nimugna’g problema sa traffic

Naputos sa pagsaway sa gatusan ka mga motorista ang Mayor Tomas Osmeña Cup VI National Drag Race Competition nga gipahigayon diha sa South Road Property.

Ang gatusan ka mga motorista nasagmuyo sa mga organizer sa maong kalihukan tungod sa walay klarong patakaran sa trapiko gumikan kay gikan sa lungsod sa Minglanilla hangtod sa Natalio Bacalso naapektuhan ang dagan sa trapiko sugod kagahapon sa buntag.

Walay mga sign o karatula gikan sa dakbayan sa Talisay nga mag-warning nga dili pasudlan ang nahisgutang lugar gumikan sa drag race.

Nagpunsisok ang mga taxi ingon man pribadong sakyanan diha sa barangay Laray.Ang mga motorista nagbagulbol tungod kay gihatagan pa kinig kahigayunan nga makasulod sa SRP apan pag-abot sa may tulay gipabalik sila sa Talisay.

Hinungdan nga kadtong motoristang gikan sa Naga- Minglanilla ug ang mobalik sa South nga mga sakyanan   nagdasok sa Highway N. Bacalso.

Kulang usab ang mga tinugyanan sa City Traffic Operation Management (CITOM) nga  nagbantay sa dagan sa trapiko.