Drayber gidul-ita’g pusil, tipi

Patay nang napalgan ang usa ka 61 anyos nga jeepney driver human kini gisulod sa iyang payag ug gipusil sa wala mailhing tawo diha sa Basak Merkado dakbayan sa Lapulapu.

Giila ang biktima mao si Abraham Legara Balansag, 61, residente sa maong dapit ug drayber og pasaheroang multicab.

Matod pa ni PO3 Manolito Abellanosa sa homicide section natulog si Balansag sulod sa iyang lawak dihang usa ka wala mailhing tawo ang kalit nga misaka ug dayong pusil kaniya.

Si Balansag samaran sa iyang dughan ug ubos nga bahin sa dalungan gamit ang usa ka kalibre .45, wala na madala sa tambalanan.

Wala pa hisayri kung unsay motibo sa pagpatay sa biktima.  Usa ka kabhang sa kalibre .45 ang nakita sa crime scene.