Nasudan og balik sa dautang espiritu niadtong miaging gabii didto sa ilang tagsatagsa ka pinuy-anan ang duha ka tinun-ang babaye sa 4th year sa Badian National High School nga una nang nag-wild ug nakuyapan atol sa oras sa klase dihang giingong gisudlan sa dautang espiritu niadtong Huwebes sa buntag.
Gibutyag ni Mrs. Gilberlieta Vergantinio, class adviser sa 4th year section Mabini dihang nahinabi sa Banat News wala nila patunghaa kagahapong adlawa sila si Honey Rachel Gabutan ug Honey Be Rekeron human kini masudli og balik sa dautang espiritu didto sa ilang tagsatagsa ka pinuy-anan niadtong milabay’ng gabii.
Matud ni Vergantinio mitunga unta si Honey Be kagahapon sa buntag apan iya kining gipasabot ug gipapauli aron makapahuway og maayo human nabalitaan niya nga nasudlan og balik sa dautang espiritu ang maong duha niya ka estudyante ug nag-wild na usab kini sa ilang panimalay.
Gidugang ni Verganitinio nga nagsulti na usab sila sa ilang kanhing prinsipal nga papasaron sa klase ug dili na lang una pabalikon og tungha ang maong mga estudyante ilabi na kay hapit na usab ang bakasyon ug aron paglikay nga dili kini masudlan og balik sa dautang espiritu.
Gikonpirmar ni Vergantinio nga nasudlan og dautang espiritu ang upat ka tinun-an apil na nila ni Honey Be ug Honey Rachel nga nag-wild ug nakuyapan niadtong Huwebes.
Matud niya nagsugod ang gikahibudngan nilang dili ingon nato sa maong tunghaan dihang gibenditahan ang bag-o nilang tunghaan nga dunay upat ka lawak saringan niadtong milabay’ng semana.
Hinuon gibutyag ni Vergantinio nga normal na ang klase kagahapong adlawa ug wala na masundi ang maong dautang panghitabo human ila gipabenditahan og balik ni Fr. Nazario Vocales ang tunghaan nga maoy giklasehan niini niadtong Huwebes diin nahitabo ang giingong pagsulod sa dautang espiritu ngadto sa mga pipila ka estudyante.
Sayo niini, ang kapolisan sa Badian pinaagi ni PO1 Josephine Barriermente mibutyag subay sa gihimo niining imbestigasyon nga walay mga magtutudlo nga mikonpirmar nga nasudlan og dautang espiritu ang maong upat ka tinun-an nga nakuyapan tungod kay gituohan niini nga gipanggutom lang kini ug napasmo.