Shotgun sa gwardiya mibuto, duha igo

Duha ka mga tawo ang naigo human aksidenteng  mibuto ang  shotgun sa usa ka gwardiya diha sa gialagaran niining bangko dihang nagbantay kini sa niabot nga armored van kagahapon sa buntag diha sa dalan P. Del Rosario ug Junquera ning dakbayan.

Ang mga biktima mao sila si Romeo Alferez, 43, nga taga Barangay Guindarohan, lungsod sa Minglanilla ug Carena Amadeo, 19, nga taga Sindulan, Mabolo niining dakbayan.

Samtang ang gitumbok nga nakapusil mao si Feli Estrera ubos sa DASIA Security Agency ug nadestino sa Postal Bank diha sa nahisgutang lugar.

Segun sa pasiunang imbestigasyon sa Homicide Section, ang duha ka mga biktima nag-atang og kasakyan nga PUJ.

Apan si Estrera niadtong tungora diha sa gawas sa maong bangko kinsa naghuwat nga moabot ang armored van.

Sa dihang naabot na ang armored van, giinggansa ni Estrera ang iyang shotgun apan kalit lang mibuto og naigo ang duha ka mga biktima.

Si Alferez nakaangkon og samad pinusilan sa tiyan samtang si Amadeo diha sa walang bukton, paa ug tuong kamot.

Ang duha gidali pagdala sa Cebu City Medical Center samtang si Estrera ang gipaubos sa imbestigasyon  sa kapolisan kabahin sa maong hitabo. (Rey B. Pasaporte)