Anak ni Bro Soc nagdala’g armas

Anak ni Mayor Socrates Fernandez nga si Joavan ang gipasanginlang nagdala og pusil sa  dihang nagkuha sa iyang ig-agaw niadtong Martes sa gabii gikan sa tunghaan sa Tabunok Night High School sa dakbayan sa Talisay.

Daling mitaho ngadto sa kapolisan diha sa Barangay Poblacion si Martin Alimento, security guard ubos sa Viscor security  agency nga nadestino sa tunghaan.

Base sa imbestigasyon sa mga polis nga mga alas 7:55 sa gabii samtang aduna pay klase kalit lang mitunga si Joavan diha sa nahisgutang tunghaan diin gusto niining kuhaon ang iyang ig-agaw.

Si Alimento mipasabot kang Joavan nga adunay patakaran ang tunghaan diin kinahanglan una nga mosumiter siya og  sulat ug paaprobahan pa kini ngadto sa prinsipal.

Ang nahisgutang gwardiya  mipahibawo ngadto sa prinsipal kabahin sa tumong ni Joavan.

Base usab sa imbestigasyon sa mga polis nga ang prinsipal nga si Jeffrey Sablero misugo kang Alimento nga pasudlon si Joavan aron personal kining makigsulti ngadto kaniya.

Giduol ni Alimento si Joavan kinsa diha sulod sa sakyanan gawas sa gate sa tunghaan ug iya unta kining sultihan kabahin sa sugo sa prinsipal apan gibati og kabalaka ang gwardiya tungod kay ang suspetsado giingong naggunit kini og pusil ug nangutana ngadto sa gwardiya nga nagkanayon “asa man diay ang inyong prinsipal?”

Sa maong reaksiyon ni Joavan, gitugotan na lang sa gwardiya nga pagawson ang ig-agaw sa suspetsado.

Human sa usa ka oras ang milabay gihatod usab og balik ni Joavan ang ig-agaw niini ug si Alimento daling mipa-blotter sa maong hitabo ngadto sa mga polis.