KTV bars sa Talisay law-ay og pasundayag

Human sa isyu sa prostitusyon sa mga minor de edad diha sa Barangay Poblacion, dakbayan sa Talisay gikataho nga adunay usa ka KTV bar diha sa Barangay San Isidro ang giingong adunay mga babaye  nga mopahigayon og law-ay nga pasundayag panahon sa tungang gabii.

Si Bise Mayor Lani Abarquez sa wala pa kini mobiya paingon sa Netherlands aron motambong og seminar duha ka semana ang milabay nagkanayon nga iya nang giawhag ang hepe sa kapolisan sa dakbayan  Supt. Romeo Perigo nga mopahigayon og pagpangronda sa maong KTV  bar human siya makadawat sa maong taho nga dunay mga babaye ang magpasundayag og law-ay.

Matud sa bise mayor nga nahibulong siya nga si Perigo  wala mohatag og pagtagad sa iyang awhag nga iparonda ang maong KTV bar.

Gikataho usab nga ang maong ktv bar ang gipanag-iya sa usa ka polis.

Human makadawat sa nahisgutang taho si Konsehal Shirley Belleza, tsirman sa komitiba sa kababayen-an, kabataan ug pamilya   daling misita ngadto kang Jane Enrile, hepe sa permit and licensing sa siyudad kun ang nahisgutang establisamento aduna bay permit sa pagpamaligya og mga ilimnong makahubog.

Si Belleza mipahibalo ngadto sa konseho nga ang maong establisamento adunay permit nga mag-operate og negosyo apan wala kini permit nga mobaligya og mga ilimnong makahubog labaw na ang giingong law-ay nga pasundayag sa mga babaye.

Si Konsehal Ben Abatayo nagkanayon nga kaniadto ang maong establisamento  gimanduang ipasirado sulod sa usa ka semana human masuta nga ang permit niini alang lang sa KTV dihang siya mismo ang mibisita sa lugar.