Traffic enforcer ok ni Pat armasan

Pabor ang hepe sa kapolisan sa dakbayan sa Sugbu Sr. Supt. Patrocinio Comendador nga padalhon og armas ang mga   traffic enforcer sa dakbayan.

Kini maoy giklaro ni Comendador aron usab makapanalipod ang mga traffic enforcer sa ilang kaugalingon batok niadtong mga tulisan nga kanunay’ng  mamiktima og  pasahero sa PUJ.

Giklaro ni Comendador nga risgo gyud ang trabaho sa mga traffic enforcer ilabi na kun aktibo kaayong manakop niadtong mga tulisan diin mameligro na hinuong panimaslan sa mga kriminal.

Matud pa niini nga walay problema kaniya nga makadala og armas ang mga traffic enforcer apan gikinahanglan kining mo-comply sa mga  rekisitos nga gikinahanglan.

Alang kaniya angayan lang nga adunay armas ang mga traffic enforcer gumikan kay kini maoy daling maka-responde kun ugaling adunay mga pagpanulis sa kadalanan.

Samtang subay usab niini hatagan sa kapolisan sa dakbayan sa Sugbu og pasidungog ang duha ka traffic enforcer nga sila si Donald Rivera ug Alberto Ollaban nga maoy nakasikop sa duha ka mga tulisan nga namiktima og pasahero sa PUJ diha sa barangay Carreta dalan Gen. Maxilom niadtong niaging adlaw.

Moduso usab sila’g endorsement sa City Traffic Operation Movement (CITOM) ingon man sa Cebu City Council kini aron mahatagan   og award silang Rivera ug Ollaban.