Internet cafe sa Lorega gitulis

Dul-an sa singkwenta mil ka pesos  nadagit sa unom ka wala mailhing tulisan  mibiktima sa usa ka internet café  sa eskina Echavez, barangay Lorega San Miguel ning dakbayan kagahapon sa kaadlawon.

Base sa report sa Theft and Robbery Section ang tag-iya, kawani ug kustomer sa EveryOnline 88.Net Café  gipanghimulbolan sa ilang mga cellphone sa unom ka wala mailhing suspetsado nga nagdalag armas ug mahait nga hinagiban mga alas dos sa kadlawon kagahapon.

Ang unom ka mga suspetsado kalit lang misulod ug mideklarar nga tulis ug gipanguha ang mga cellphone apil na ang P20 mil nga kantidad sa CPU sa computer dayon sibat luwan sa nag-waiting nang daan nga taxi.

Usa ka attendant sa nahisgutang internet café   nakaangkon og samad sa iyang ulo human bunali sa puloan sa armas sa usa sa mga suspetsadong tulisan dihang misukol.

Ang mga biktima giila sa kapolisan nga sila si Exsequel Trinidad, tag-iya sa maong café  nga nakuhaan og P4 mil, Nokia cellphone nga nagkantidad og P5mil  ingon man P20mil nga kantidad sa CPU nga gidala sa mga tulisan.

Nakuhaan usab sa ilang mga butang mao sila si Mark Jakosalem, P2 mil  nga wristwatch ug P800 nga silver ring, Rosemarie Gutierez, P6 mil  nga kantidad sa cellpone, Marrisa Malazarte, P3 mil  nga Motorola, Nodal Jesulga, make-up kit nga mokantidad og usa ka libo ka pesos, Ernefel Beldad  P3mil nga Motorola, Jimmy Calledo usa ka libo ka pesos nga kantidad sa Sony Ericsson.

Ang hepe sa kapolisan sa dakbayan sa Sugbu, Sr. Supt. Patrocinio Comendador nagtuo nga mga sakop sa street hoodlum ang mga suspetsado hinungdan nga iyang gimanduan ang taga TRS sa pag-intensify sa mga suspetsado kini aron pag-ila base usab sa ilang mga profile sa mga street hoodlum.