6-anyos nalatayan ligid sa bus

Nigawas ang tinai sa usa ka 6 anyos nga lalaki human kini nalatayan sa ligid sa bus nga de pasaheroan sa dihang kalit nga milabang sa miaging buntag diha sa sitio Combado, barangay Bagay, Daanbantayan Cebu.

Gisuwayan pa unta pagdala sa Daanbantayan District Hospital apan patay nang daan nga nahidangat ang biktimang si Kent Lloyd Anosa, residente sa nahisgutang lugar.

Ang nakaligis mao ang D’ Rough Riders nga dunay markang “Ecstacy” nga nagbiyahian sa rotang Maya Daanbantayan ug North Bus Terminal nga gimaneho ni Gerard Omolon, taga Pardo ning dakbayan sa Sugbu.

Matud pang SPO3 Fe Clarisa nga nahinabi sa Banat News nga pasado alas 10 sa buntag  ang biktima naglingkod daplin sa karsada nga dunay gikaduwa nga laing bata diha sa nahisgutang dapit.

Ang bus gikan sa Maya ug paingon sa North Bus Terminal.

Sumala pa ni SPO3 Clarisa nga base sa alegasyon sa drayber wala niya mabantayi ang maong bata nga milabang sanglit kalit kaayo hinungdan didto na kini naigo sa luyong bahin sa bongbong ug napasok sa ilawom ug nalatayan sa ligid.

Gumikan sa kabalaka nga kulatahon sa mga tawo sa dapit, si Omolon mipasirit sa pagpadagan ug  sa Bogo Police Station mitahan ug gi-turn over lang usab dayon ngadto sa Daanbantayan Police Station.